ONU Espera ODS Sei Integra iha Planu Estratejiku Nasional

DILI, www.news-viptv.com – Reprezentante Organizasoens Nasoens Unidas (ONU) iha Timor-Leste espera Objetivu Dezenvolvimentu Sustentável (ODS) Timor-Leste nian sei integra iha Planu Estratejiku Nasional.

ONU nian esperansa ne’e hato’o hosi Koordenadór Rezidente Organizasaun Nasoens Unidas (ONU) iha Timor-Leste, Funmi Balogun, wainhira hasoru Prezidente José Ramos-Horta, hodi ko’alia kona-ba ONU nia apoiu mai Timor-Leste atu alkansa ODS nasaun nian.

“Ita reafirma fali serbisu ne’ebé ita halo iha área saúde, edukasaun, sistema ai-han, nutrisaun, oinsá ita kontinua apoia governu, oinsá ita ajuda governu hanesan ONU,” dehan Funmi Balogun ba jornalista sira, Kuarta (2/8/2023), iha Palasiu Prezidensial Dili.

Nia hatutan, “Ita hanoin ne’e tempu di’ak atu bele halo tanba planu estratéjiku ba Timor-Leste sei haree husi governu atuál.”

Balogun hateten, ONU sei kontinua apoia governu Timor-Leste iha formas barak, inklui fó apoiu tékniku, formasaun no rekursu.

“Ita presiza kontinua serbisu ho maneira ne’ebé koordenadu. Nune’e favorese serbisu ne’ebé ita halo hamutuk ho ONU nomós ho ajénsia sira,” nia dehan

ONU, esplika Balogun, iha kompromisu atu serbisu ho governu Timor-Leste hodi atinje ODS no harii futuru ida ne’ebé di’ak.

Nia mós informa enkontru kona-ba ODS ne’ebé sei realiza tinan ne’e iha Nova Iorke, ne’ebé governu sira sei kompromete oinsá ODS sei implementa iha sira-nia nasaun to’o 2030.