MNEK Halo Diskusaun Planu Kooperasaun ho Embaixador Nasaun 11

DILI, www.news-viptv.com – Hafoin entrega karta kredensial ba Prezidenti Republika (PR) Jose Ramos-Horta, embaixador nasaun 11 hasoru malu ho  Ministru Negósiu Estranjeiru no Kooperasaun (MNEK), Bendito Freitas hodi halo diskusaun ba planu koperasaun iha futuru.

“Intensaun hasoru malu ne’e maka atu bele hato’o sira nia hanoin planu kooperasaun ba futuru,” informa Ministru Bendito Freitas ba jornalista sira, Tersa (20/2/2024), iha Edifisiu MNEK, Dili.

Ministru esklarese, hosi diskusaun refere, possibilidade ba Timoroan diplomata sira hodi hetan prespetiva differente kona-ba polítika externa no polítika diplomasia husi ânglu ne’ebe la hanesan.

“Aborda kooperasaun ba futuru sira mos iha instituisaun servisu diplomatiku ne’ebe prontu atu ita nia Timoroan diplomata atu bele tuir formasaun, tamba ha’u hanoin importante ba ita mak iha oportunidade ba ita atu asesu ba prespetiva diferente konaba polítika externa no polítika diplomasia ho ângulu differente husi país ne’ebe mak iha sei halo kouperasaun hamutuk,” dehan ministru ne’e.

Embaixador 11 ne’e maka hosi nasaun Repúblika Arab Ejitu, Kanada, Dinamarka, Repúblika Helenika (Grece), Repúblika Islamista Iran, Repúblika Islamika Pakistaun, Reinu Kamboja, Repúblika Demokratika Povu Lao, Repúblika Demokratika Povu Algeria, Repúblika Afrika Sul no Suesia.