Mediku Xina Nain 12 Simu Medalla Merito hosi PR Timor-Leste

Dili, www.news-viptv.com – Hare ba kontribuisaun mediku Xina iha desenvolvimentu setor saude, Prezidenti Timor-Leste, Jose Ramos-Horta fo medalla merito no diploma rekonsiliasaun ba pesoál médiku Xina sanulu-resin-rua (12).

Aktu rekoñesimentu ida-ne’e xefe estadu entrega dereta ba mediku Xina nain 12 ne’e iha Palasiu Prezidensial iha Segunda (23/10/2023) hanesan símbolu ba apresiasaun ne’ebé kle’an ba sira-nia dedikasaun no servisu.

Iha komunikadu imprensa ne’ebe redasaun assesu hateten, hahú kedas husi akordu kooperasaun entre Repúblika Demokrátika Timor-Leste ho Repúblika Populár Xina iha Governu Konstitusionál Timor-Leste nian ba dahuluk, Xina sai nu’udar apoiante ida-ne’ebé metin ba setór saúde Timor-Leste nian. Apoiu ida-ne’e hahú ho ekipa médika dahuluk ne’ebé mai iha fulan Dezembru 2003, hodi marka momentu importante ida iha jornada saúde Timor-Leste nian.

Durante tinan barak, pesoál médiku Xineza hamutuk 123 mak dedika aan hodi servi Timor-Leste.

Ekipa Médiku Xina nian ba da-9 ne’ebé kompostu husi pesoál médiku 12, nunka kole hala’o atividade médiku oioin durante tinan rua nia laran. Sira hala’o papél importante iha área espesializada oin-oin inklui kardiolojia, urolojia, operasaun jerál, obstetrika no jenekolojia, ortopedika, anestezia, reabilitasaun TCM, enfermeiru, ai-moruk kuidadu intensivu, no radiolojia. Sira-nia susesu hahu desde sai pioneiru ba cirurgias laparoskópiku to’o introdús tékniku médiku inovativu sira.

Nota partikulár mak estabelesimentu Sentru Nasionál Litotripsia Timor-Leste, hodi fornese servisu urolojiku esensiál ba komunidade. Introdusaun teknolojia monitorizasaun Holter no monitorizasaun ambulatóriu ba presaun raan prense ona lakuna krítiku sira iha servisu saúde nian.

Iha esforsu kolaborativu ida, ekipa ne’e mós envolve ativamente iha inisiativa sıra ba kapasitasaun, formasaun ba profisionál saúde lokál sira iha teknolojia médika avansadu sira, hodi asegura sustentabilidade ba sira-nia impaktu.

Aleinde sira-nia papél fundamentál iha Ospitál Nasionál Guido Valadares, Ekipa Médiku ida-ne’e la’o liu no la’o maka’as liu, hodi hala’o vizita ba tratamentu médiku gratuita ba suku sira ne’ebé remota. Liu husi esforsu hirak-ne’e, sira to’o ona ba iha pasiente 3000 liu, iha área remota sira, ne’ebé sei hasoru dezafiu sira iha asesu ba kuidadu médiku. Ekipa ne’e mós fahe ai-moruk gratuita, hala’o diagnóstiku kona-ba Aimoruk Tradisionál Xina (TCM) liu 250, no fornese relatóriu X-ray 270 iha sentru saúde oin-oin iha Timor-Leste, hodi hatudu dedikasaun ekipa nian ba kuidadu saúde ne’ebé komprensivu.

Hola prezensa mos iha seremonia entrega medalla ne’e maka Ministra Saude, Elia Amaral no Embaixadora Xin aba Timor-Leste, Wang Wenli.

Individuál sira husi Ekipa Médiku Xina da-9 ne’ebe simu onra husi Prezidente Timor-Leste maka:

1. Liu Yabin, Departamentu Radiolojia, Ospitál Afiliadu dahuluk iha Chengdu Medical College
2. Xie Yunfeng, Departamentu Urolojia, Ospitál Povu Primeiru iha Neijiang
3. Zhang Ke, Departamentu Operasaun Jerál, Ospitál Sichuan Cancer
4. Liang Xiaobo, ICU, Southwest Medical University Afiliated Hospital
5. Zhang Min, Departamentu Obstetrika no Gynekolojia, Ospitál Povu Deyang
6. Long Hua, Departamentu Anestezia, Ospital Povu Segundu Deyang
7. Zheng Maowen, Departamentu Enfermeira, Ospital Povu Provinsionál Sichuan
8. Zeng Hao, Departamentu Ortopédiku, Ospitál Neijiang ba Aimoruk Tradisionál Xina
9. Wen Lianbin, Departamentu Kardiolojia, Ospitál Povu Provinsionál Sichuan
10. He Lingna, Departamentu Acupuntura, Universidade Chengdu Traditional Chinese Medicine University Affiliated Hospital.
11. Pan Meiling, Departamentu Saúde Sentru Komunikasaun Internasionál Sichuan
12. Xu Xigui, Departamentu Saúde Sentru Komunikasaun Internasionál Sichuan.

Ekipa Médiku Xina da-9 remata ona sira-nia servisu ho susesu. Ekipa foun ne’ebé foin to’o kompostu husi médiku nain sanulu-resin-rua husi ekipa médiku da-10 asumi ona sira nia kna’ar iha ospitál Nasional Guido Valadares iha loron 18 Outubru 2023.

Ekipa Médiku Xina hotu-hotu ne’ebé serve iha Timor-Leste mai husi Provínsia Sichuan, Repúblika Populár Xina.