Macario Sanches Eleitu ba Prezidenti CDTL

DILI, www.news-viptv.com – Sekretariu Jeral Federasaun Kempo Timor-Leste, Macario Sanches eleitu ba Prezidenti Konfederasaun Desportu Timor-Leste.

Macario Sanches eleitu hafoin iha Assembleia Jeral CDTL ba dalima hetan votos 14 hosi federasaun desportiva hosi federasaun 25 ne’ebe iha dereitu votos.

Iha eleisaun ba kargu prezidenti nian Macario Sanches kompete ho prezidenti sessante Afranio Xavier Amaral ne’ebe hetan deit votos 11.

Macario Sanches sei lidera kargu Prezidenti durante tinan hat ba oin hahu 2021 to’o 2025 ho nia vise prezidenti nain rua maka Inocencio Araujo da Silva no Zeferino Viegas Tilman.

Alende ne’e pakote Macario Sanches nian ne’ebe eleitu ba Konsellu Juridiku nian maka Gabriel da Costa ba prezidenti no memebru nain 3 maka Emilio Aparicio, Jose Marcal no Domingos da Costa.

Entertantu eletu ba Konsellu Fiskal maka Rogerio Amaral Soares nudar prezidenti, vise prezidenti maka Natalino Hornai no Sekretariu maka Noe Gaspar.

Ba meja presidensia assembelia jeral nian delegadu sira kontinua hili Aniceto Goveia Berlelo nudar prezidenti meja no vise maka Herculano dos Santos ho Santina da Costa ba Sekretaria meza.

Iha Assembleia Jeral ne’e mos CDTL simu membru federasaun foun 9 maka Federasaun Sepak Takraw, Rama Hana, Muathai, Hockey, Handball, Taqball, Pentahlon, Roller no Billiard.