Loron Mundial Traballador, PR Ramos-Horta: Tenki Garante Traballador iha Empregu Seguru no Digna

Dili, www.news-viptv.com – Prezidente Republika (PR), Jose Ramos-Horta husu ba ho-hotu tenki garante katak traballadór hotu-hotu iha empregu ne’ebé seguru, kondisaun digna no iha kapasidade atu sustenta sira-nia família ho adekuadu.

“Ita tenki kontinua defende direitu traballador sira-nian no asegura oportunidade ne’ebé hanesan ba hotu-hotu ka ema hotu,” hateten PR Ramos-Horta iha nia mensajem ba Loron internasional Traballador sira ba traballador Timoroan hotu.

Iha komunikadu imprensa ne’ebe redasaun simu, Xefi Estadu hateten, 1 Maiu mak data signifikante ida bainhira fó onra no selebra kontribuisaun husi traballadór sira iha mundu tomak. Loron Internasional Traballadór nian hanesan oportunidade ida ba traballador sira iha nivel globál atu hamutuk iha solidariedade, ita halibur hamutuk hodi selebra ita-nia rezultadu servisu no rekoñese progresu ne’ebé ita halo hodi hadia kondisaun servisu nian.

“Iha Loron Internasionál Traballadór nian, ita hateke ba oin ho orgullu ba progresu ne’ebé ita hetan ona ba traballadór sira iha Timor-Leste. Ami rekoñese esforsu boot husi traballadór hotu-hotu ne’ebé kontribui ba dezenvolvimentu ekonómiku no sosial iha ita-nia nasaun joven ida ne’e,” dehan PR Ramos-Horta.

Nia kontinua, “Ohin loron, ita selebra serbisu maka’as, dedikasaun no sakrifisiu sira husi traballadór sira iha ita-nia nasaun. Ita-boot sira sai nu’udar kabas ba ekonomia no dezenvolvimentu Timor- Leste nian. Liu husi ita-nia servisu maka’as no esforsu loroloron nian, ita-nia nasaun sei la’o ba oin, Unidu iha ita-nia esforsu sira, ita bele harii Timor-Leste ida-ne’ebé forte liu, prósperu liu, no ida-neʼebé ekuitativu liu ba traballadór hotu-hotu no sira-nia familia”.

Xefi Estadu, desezu ba traballadór sira hotu kontente ksolok ba selebrasaun Loron Traballadór nian, nakonu ho pás no ksolok, no hein katak tinan oin mai sei lori prosperidade no progresu barak liután mai ita.