Liberdade Imprensa Importante ba Konstrusaun Estadu iha Timor-Leste

DILI, www.news-viptv.com – Timor-Leste iha konstrusaun estadu sura mos ho Liberdade imprensa ne’ebe konsidera importante iha Timor-Leste.

Iha komemorasaun loron nasional Liberdade imprensa ba daruak ne’ebe selebra iha edifisiu Concelho Imprenssa (CI) Kintal Bo’ot, Primeiro-Ministro Interinu Mariano Assanami Sabino hatete, Liberdade imprensa importante tamba parte integradu husi prosesu konstrusaun estadu no konstrusaun nasaun.

“Ema lubuk ida ne’ebe fo nia an iha prosesu libertasaun nasional ne’ebe mak ita hotu hatene katak atu fo sai informasau, ne’e difisil tebes iha momentu ne’eba, iha média oioin ne’ebé mak ita kria ita tempo rezistensia hanesan Vox Populi, Talitakum, Talitakum ne’e katak halo ita la toba halo ita hader hela deit, no iha mos Suara Timor-Timur (STT), media unidade, media liberdade no 1999 nian mak Vox Populi ne’e, media sira ne’ebe ita hari iha tempu Indonesia ne’e parte ida ita halo koperasaun no parte ida mós ita fo sai informasaun ne’ebe importante ba liur,” dehan Assanami iha nia deskursu iha komemorasaun loron nasional Liberdade imprensa ho tema atmosfera liberdade imprensa iha nasaun demokratiku, Tersa (8/10/2024).

Nune’e mos eis Prezidenti Republika, Taur Matan Ruak enkoraja jornalista sira atu brani nafatin no tenki estuda atu nune’e bele fo sai Informasaun ne’ebe tebes, los no lá bosok.

“Liberdade de espresaun ne’e importante los. Mais, iha mós direitos balun ke proteje husi lei, tamba ne’e hau enkoraja par imi kontinua brani mais antes imi nia notisia informasaun sira sai favor ida imi tenki estuda didiak rever halo didiak ke ida ne’e tebes los no lá bosok, se ita hare didiak ohin loron media sosial mak domina, soke media sosial nia la eduka ema, lori ema hetok tun liu tan baixa nia an at liu tan, media sosial saída mak iha? Intriga, mentirá, insulto, buat hotu (deskulpa) porkaria ne’e iha media sosial, se Itá lá kuidado Itá monu iha ne’e,” dehan Taur Matan Ruak.

Taur Matan Ruak mos rekonese katak papel jornalista ne’e importante tebes, tamba laiha emosaun, maski jornalista sira sempre senti kiik iha ema bo’ot sira nia le’et maibe iha lian ne’e kroat no makas liu.

“Klaru ke ambiente situasaun uluk ho agora la hanesan, agora ne’e dazafiu bo’ot tebes tanba imi bele foti ema mais imi mos bele oho ema, oho ema nia kreabilidade oho ema nia presijiu, oho ema nia karater, se imi la kuidado fo sai Informasaun ne’ebe la los,” nia hateten.

Nia mos hateten, “Jornalista nia papel eduka informa lolos responsabiliza ema hotu-hotu ba nia aktu, Tamba ne’e ba jornalista sira imi kontinua nafatin esforsu imi nia an mesmu ke ita hatene ohin loron iha mundu kadaves mais jornalista mate hanesan iha Palestina iha mos fatin seluk Jornalista sira sakrifika sira nia an para atu fo sai buat ne’ebe los, exatamente jornalista ne’e enkomoda ho liafuan português dehan kuando voce não têm argumento, ataka o argumentador jornalista ne’e hanesan nati halo ema kalan toba la dukur, imi tenki brani nafatin,” dehan Taur Matan Ruak.

Selebrasaun loron nasional Liberdade imprensa ba daruak tinan ne’e realiza iha Dili ho Feira Foto Jurnalismo nian.

“Tinan ida ne’e CI bele selebra atividade ida iha nia resintu rasik, tinan tinan ita selebra loron nasional liberdade imprensa iha balibo, cidade ida ne’ebe uluk ho naran aldeia naran-laek, ohin ita hahu ita nia semana ambiente loron nasional liberdade imprensa ho feira ida produtu jornalistiku, itá hatene katak fotografia nu’udar meius informasaun ida ne’ebe koalia rihun ida resin, liu husi foto ida bele koalia liafuan rihun ida resin, itá hotu bele interpreta fotografia ida nia signifikasaun,” dehan Prezidenti CI, Otelio Otte.

Otelio Otte hateten, CI nu’udar instituisaun estadu independente ida no nu’udar orgaun regulador ida kontinua existe, ho nia garantia primeiru katak cidadaun hotu-hotu tenki asesu ba informasaun, cidadaun hotu-hotu iha liberdade ba opiniaun, liberdade ba espresaun, cidadaun hotu-hotu iha direitu atu koalia no espresa nia hanoin.