La Autoriza husi Saude, PNTL Bandu Sirkulasaun Sigaru Manchester United Kingdom

Dili, www.news-viptv.com – Relasiona ho sirkulasaun sigaru Mancehester United Kingdom ne’ebe hatama illegal no la hetan autorizasaun husi Ministeriu Saude, Polisia Polísia Nasional Timor-Leste (PNTL) alerta ona hodi bandu sirkulasaun sigare refere iha Timor-Leste.

Iha konferensia imprensa, Departamentu Investigasaun Kriminal Nasional (DIKN) informa, Servisu Nasional Inteligensia (SNI), Servisu Informasuan Polísia (SIP) no Alfândega iha 22 Jullu 2024 detekta sigaru elézitu ne’ebe maka tama iha Portu Tibar ne’ebe maka Ministeriu Saúde (MS) la autoriza.

Xefe DIKN Superintendente Polísia JB. Reis esplika hafoin detekta kompaña uza dokumentu seluk hodi bosok Autoridade Portu nian hodi manifesta lista aprezenta katak sasan ne’ebe sira hatama iha container ne’e Supermie (Indomie) hafoin detekta ikus sigaru.

“Hodi nune’e ekipa konjunta halo operasaun konsege prende kareta Tronton ida ne’ebe tula hela Sigaru sira ne’e lori mai hela iha Kuartél Jerál PNTL no identifika katak iha kareta laran ne’e iha deit Sigaru Karton 272 no seluk ekipa Konjunta sei buka tuir nafatin, relasaun ba kazu ida ne’e, DIKN aprezenta ona ba Ministeriu Públiku,” dehan Superintendente JB. Reis, Kuarta (24/7/2024), iha Kuartel Jeral PNTL, Kaikoli, Dili.

Ekipa konjunta, esplika JB. Reis, kontinua detekta kareta Fuso ne’ebe para iha area Pantai Kelapa nune’e ita sei husu responsabiliza ba kompaña na’in atu koopera ho ami hodi aprezenta. Uza oportunidade ida ne’e, hakarak públika ba maluk sira Sigaru ne’e ho marka Manchester United Kingdom, nia iha masu mean no mutin.

“Ba maluk balun, karik ema ruma faan ka ema ruma lori hodi halo sirkulasaun iha ita bo’ot sira nia kios, husu atu labele hola no aprezenta ba Polísia atu bele halo atuasaun. Tanba sigaru ne’e rasik MS la autoriza tama no nia la kumpri rekezitus sira ne’ebe ita nia governu estabelese iha Portu Dili,” nia dehan.

Polisia mos sedauk bele halo notifikasaun ba na’in kompaña refere tamba sei iha hela estrangeiru.

“Karik nia fila mai maka ami sei halo notifikasaun hodi bele aprezenta ba Tribunal, ami sei halo operasaun hodi buka tuir hotu, karik halo sirkulasaun iha merkadu ruma, sé maka lori ba, ita sei buka tuir hotu ida ne’e,” nia esplika.