Kuba Apoia Nafatin Area Saude ba Timor-Leste

DILI, www.news.viptv.com – Governu Kuba kontinua nia komitmentu hodi apoia nafatin Timor-Leste iha area saude.

Embaixadora Kuba ba Timor-Leste, Grisel Alina Aldama Innis apoia Kuba durante ne’e iha area saude laos deit simu Timoroan sira eskola iha Kuba, inklui mos haruka nia mediku espesialista sira hodi servisu iha sentru saude sira iha Timor-Leste.

“Kuba sira sempre prontu atu apoiu Timor-Leste, tamba iha base ida nu’udar amizade entre Kuba ho Timor-Leste ho koperasaun ida ne’e Kuba sei apoiu Timor-Leste iha parte saida deit mak presisa,” dehan Embaixadora Grisel ba jornalista sira hafoin inkontru ho Primeiru Ministru Xanana Gusmão iha Palacio do Governo, Dili, Segunda (28/8/2023).

Alende apoia iha area saude, embaixadora ne’e mos esplika, Governu Kuba sei kontinua mos nia apoia ba area edukasaun liu hosi koperasaun ho Ministériu Juventude Desportu Arte no Kultura no Universidade Nasionál Timor Lorosa’e (UNTL) hodi haruka estudante sira ba hala’o estudu iha área pedagojia no arte nian.

Embaixadora ne’e mos informa, PM Xanana husu ba atu haree planu ba oin governu bele investe osan hodi loke fabrika aimoruk no ekipamentu mediku nian iha Timor-Leste.