“Kriminaliza” Jornalista ho Denunsia Kalonioza, Francisco Jeronimo La Merese Asumi MAPKOMS

DILI, www.news-viptv.com – Asaun Francisco Jeronimo atual Ministru Assuntu Parlamentar no Komunikasaun Sosial (MAPKOMS) halo hodi lori Xefi Redasaun hatutan.com ba tribunal ho artigu denunsia kalonioza hatudu membru governu ne’e laiha moral no la merese asumi kargu ministru ba asuntu komunikasaun social nian.

Sekretariu Jeral Timor-Leste Press Union, Zezito da Silva lamenta teb-tebes ho aktu Franscisco Jeronimo nudar ministru ne’ebe lolos promove servisu jornalista sira nudar parte komunikasaun social ba kriminaliza fali produtu jurnalista nian tamba det halo kontrolu social ba ezekusaun projetu set top box nudar programa ida hosi MAPKOMS nian ne’ebe iha irregularidade ba projetu refere.

Ho kazu ne’e, hare ba Quito SImoes nudar membru TLPU no eis prezidenti TLPU, organizasaun jornalista ne’e sei la nonok no hamutuk hodi luta nafatin atu MAPKOMS retira kazu ne’e.

Entertantu, Quito Simoes rekonese katak nia aprezenta an ona ba ministeriu publiku hodi presta deklarasaun tamba hetan diligensia hosi Fracisco Jeronimo atual MAPKOMS.

Hare ba kazu ne’e, nudar xefi redasaun no konseleiru iha Konsellu Imprensa orgaun komunikasaun social ne’ebe regula Servisu media nian hare katak notisias ne’ebe hatutan.com publika tuir kode etika jurnalista nian no tuir padraun hakerek notisias.

Tuir publikasaun hatutan.com Prezidenti Konsellu Imprensa, Virgilio Guterres konsidera denunsia kalunioza ne’ebe MAPKOMS halo hasoru jornalista hanesan tristeza bo’ot ba liberdade imprensa.

“Ida ne’e notisias triste tanba mai hosi MAPKOMS, ministeriu ida ne’ebe governu tau ho kompetensia no responsabilidade atu garante independensia media nian, independensia orgaun komunikasaun social nian. Se ministeriu ida ne’e maka uluk tiha kriminaliza jornalista sira, entaun ita la hatene tan ministeriu sira seluk ne’ebe laiha kompetensia direta kona ba orgaun komunikasaun social nian,” dehan Virgilio Guterres.

Antes ne’e, jornalista ikus ne’ebe membru governu lori hotu ba tribunal maka Raimundo Oki, jornalista The Oekusi Post ne’ebe keixa hosi eis primeiru ministru Rui Maria de Araujo ne’ebe ikus tribunal dissolve total nia kazu.

Iha tinan ne’e, reporters without border publika Timor-Leste iha pozisaun 17 hosi nasaun hotu iha mundu ne’ebe iha liberdade imprensa ne’ebe diak.

Maibe, liberdade imprensa dadauk ne’e foer hikas ho aktu Ministru Fransisco Jeronimo ne’ebe kriminaliza Servisu jurnalista nian ho artigu denunsia kalonioza.

Ekipa kobertura VIP TV.