Kontinua Ukun, FRETILIN Sei hadia Setor Edukasaun no Saude

DILI, www.news-viptv.com – Partidu Frente Revlusionario Timor-Leste Independente (FRETILIN) wainhira ukun governu sei hadia diak liu tan setor edukasaun no saude.

Promesa FRETILIN ne´e hato´o hosi Sekretariu Jeral Partidu FRETILIN, Mari Alkatiri iha komisiu politiku partidu ne´e iha Tasi Tolu, Dili, Tersa (16/5/2023).

“FRETILIN ba governu, sei hadia setor edukasaun no saude,” deklara Mari Alkatiri ba nia apoiantes sira.

Alkatiri esplika, iha setor edukasaun FRETILIN sei tau prioridade ba fasilidade eskola no kondisoens eskola, inklui kondisoens ba manorin sira ne´ebe laiha hela fatin.

Tuir nia, iha edukasaun tenki iha investimentu integradu. “Laos investimentu deit iha eskola, eskola tenki iha jestaun integrada, ba eskola laos atu aprende lee no hakerek, aprende moris ho dignu no matenek no servisu, edukasaun hamutuk ho formasaun, formasaun umana, hanesan ema moris,

atu sai ema bele moris iha komunidade nia leet, buras no solidariedade.”

Ba insfraetrutura nian, eskola tenki iha mos haris fatin no dapur hodi tein ba merenda eskolar.

“Alunus ho mestre iha nesesidade oioin, sei alunu iha merenda eskolar tenki han iha eskola

Laos han iha ai mahon. Tenki iha haris fatin, laos ba rega aihun. Prepara dapur, laos tein iha aihun,” nia hateten.

Nune´e mos ba futuru FRETILIN hakarak kada eskola tenki iha fasilidade desportu no artes nian hodi fasilita talenta estudante sira.

Sekretariu Jeral FRETILIN ne´e mos hateten, governasaun FRETILIN sei kontinua apoia grupu arte marsiais sira. “FRETILIN ukun arte marsiais sei sai oan no proteje, laiha atu dehan taka, tenki hametin filozofia foun.”

Iha setor Saude, governasaun FRETILIN  mos sei tau kondisoens ba profisionais saude sira hahu hosi dotor, enfermeira no parteira sira, inklui fasilidade no ekipamentu hodi halo servisu nian.

“Saude, falta jestaun  no organizasaun, dotores iha saude, 1300 resin, espesialista timoroan barak ba bebeik, maibe laiha kondisoens halo servisu. Panadol laiha, uma laiha, espesialista laihakondisoens sira para servius, ekipamentu para diagnosa ema nia moras laiha,” nia dehan.

Hosi setor edukasaun no saude ne´e maka FRETILIN sei dezemvolve mos seitor seluk hanesan insfraestrutura, nutrisaun no agrikultura.

“FRETILIN hakarak hadook povu no ema hosi moras, persiza infraestrutura, bee mos aguas no saneamentu. Tenki iha politika nasional para uza bee ba oioin, ba natar no animal.

Setor ne´ebe FRETILIN sei hadia maka hametin estadu hodi fo fila hikas kompetensia iha oragun estadu tuir ida-idak nia papel.

Nune´e mos setor minerais no turismu, sai mos prioridade ba Governasaun FRETILIN wainhira kaer fali ukun.

Entertantu Prezidenti FRETILIN, Francisco Guterres Lu-Olo husu povu atu kontinua vota ba FRETILIN hodi kombate korrupsaun no mall jestaun iha governu.

“FRETILIN iha kompromisiu boot katak atu liberta povu hosi mukit no kiak persiza,” dehan Lu-Olo.