Konsellu Ministru Aprova Estatutu foun ba PNTL

DILI, www.news-viptv.com – Konsellu Ministrus iha sorumutu ne’ebé lidera husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, aprova dekretu lei ba estatutu foun ba Polisia Nasional Timor Leste (PNTL), Kuarta (29/5/2024), iha Palacio do Governo, Dili.

Projetu Dekretu-Lei ne’ebé Konsellu Ministru aprova ne’e, aprezenta husi Ministru Interiór, Francisco da Costa Guterres, ne’ebé ho objetivu atu estabelese Estatutu foun Polísias nian hosi PNTL.

“Polísia sira-nia estatutu foun ida-ne’e ho objetivu atu hadi’a regulamentu atuál, ho introdusaun mudansa signifikativa sira, maka hanesan introdús fila-fali juramentu fidelidade, define inkompatibilidade no kritériu objetivu sira ba promosaun. Estabelese mós postu foun lideransa nian iha PNTL atu hatán ba nesesidade organizasionál,” hakerek komunikadu imprensa ne’ebe redasaun asesu.

Diploma ida-ne’e, reflete importánsia atu garante polísia nasionál ida ne’ebé profisionál, bein treinada no estruturada, ho objetivu atu hametin Estadu Direitu no promove demokrasia iha territóriu nasionál.

Konsellu Ministru aprova mós projetu Dekretu-Lei ida ne’ebé aprezenta mós husi Ministru Interiór, ho intensaun atu estabelese Orgánika Foun PNTL nian, ho objetivu atu reestrutura no moderniza instituisaun ne’e atu nune’e hasa’e ninia kapasidade resposta ba dezafiu nasionál ohin loron nian, ne’ebé aliña ho planu estratéjiku dezenvolvimentu no seguransa nasionál.

Alende ne’e, iha sorumutu ne’e, hahú ho dezignasaun membrus Konsellu Administrasaun Sentru Nasionál Chega! I. P., hosi Memória ba Esperansa, hodi ezerse mandatu ba tinan tolu, tanba fatin hirak-ne’e sei mamuk hela.

Konsellu Ministrus, liuhusi proposta Vise-Ministru Asuntus Parlamentares ne’ebé substitui Ministru Prezidénsia Konsellu Ministrus, nune’e, delibera hodi dezigna Señór Aniceto Guro-Bertini nu’udar membru no Señór Manuel Mesquita, nu’udar Prezidente Konsellu Administrasaun.