banner 1000x250

Konsellu Ministru Aprova Akordu Servisu Aereu ho Singapura no Indonesia

  • Share
Aviaun Singapore Airline ne´ebe antes halo ona operasaun entre Dili - Singapore. Photo: google
banner 728x90

DILI, www.news-viptv.com  – Konsellu Ministru liu hosi sorumutuk Kuarta (26/10/2022) aprova ona Akordu kona ba Servisu Aéreu sira nian entre Repúblika Demokrátika Timor-Leste no Repúblika Indonézia no Repúblika Singapura.

Akordu ne´e aprezenta husi Ministra Negósiu Estranjeiru no Kooperasaun, Adaljiza Albertina Xavier Reis Magno liu hosi projetu  Proposta Rezolusaun Parlamentu Nasionál rua.

banner 336x280

“Akordu hirak ne’e iha objetivu prinsipál atu garante realizasaun voo komersiál regulár entre Timor-Leste no Indonézia no Singapura, ho hanoin atu promove dezenvolvimentu iha setór ekonómiku, komersiál no turizmu país hirak ne’e nian,” hakerek komunikadu imprensa ne´ebe redasaun asesu.

Foin lais ne´e mos, Ministra Adaljiza Magno asina ona akordu servisu aereu ho Governu Kambodia wainhira akompana vizita estadu Presidente Republika, Jose Ramos-Horta. Antes ne´e mos Governu Timor-Leste asina ona akordu hanesan ho Brunei Darussalam.

Durante ne´e, Timor-Leste iha ona konekasaun voo ho Indonesia liu hosi Aeroporto Internasional I Gusti Ngurah Rai Denpasar, Bali. Singapura, Darwin no Kuala Lumpur.

Alende aprova akordu servisu aereu nian, Konsellu Ministrus mos aprova ona projetu Rezolusaun Governu, ne’ebé aprezenta husi Ministru Koordenadór Asuntu Ekonómiku, Joaquim Amarál, ne’ebé aprova Polítika no Estratéjia ba Setór Privadu.

Ho intervensaun lejislativa ida-ne’e ho ninia objetivu atu atinji espansaun setór privadu, nu’udar motor prinsipál ba kreximentu ekonómiku no atu hamenus dezempregu, liuhusi hadi’a ambiente negósiu, diversifikasaun baze ekonómika nasionál no promosaun inkluzaun sosiál no ekonómika.

Prevee kriasaun Konsellu Dezenvolvimentu Emprezariál ida, ne’ebé inklui entidade governamentál relevante oin-oin ba matéria ne’e, ne’ebé sei sai responsavel ba kriasaun no expansaun empreza sira, programa formasaun nian no sentru sira dezenvolvimentu emprezariál nian. Konsellu ida-ne’e ninia misaun mós atu dezenvolve programa espesiál sira atu promove revitalizasaun ba Empreza Ki’ik no Média nasionál sira.

Koordenasaun no implementasaun polítika ida-ne’e sei responsabiliza husi membru Governu ne’ebé responsavel ba área koordenasaun asuntu ekonómiku, ne’ebé iha kolaborasaun ho membru Governu sira-seluk ne’ebé responsavel ba área relevante ba dezenvolvimentu iha setór privadu.

Konsellu Ministrus, tuir projetu ne’ebé aprezenta husi Ministru Obras Públika, Abel Pires da silva, delibera atu autoriza prosedimentu Aprovizionamentu ba obras públika ne’ebé relasiona ho projetu konstrusaun Manleuana River Training Works no Rede Drenajem D04, iha Kaikoli. ho valór intestimentu ida ho totál hamutuk millaun US$ 15,6.

Konsellu Ministrus delibera mós atu autoriza atu hala’o despeza bazeia ba kontratu depózitu selebradu ida ho Banku Nasionál Komérsiu Timor-Leste ba implementasaun Liña Kréditu “Fasilidade Garantia Kréditu Suave” no ho transferénsia millaun US$ 50  husi konta tezouru ba konta bankária ne’ebé loke bazeia ba kontratu ne’e. Projetu deliberasaun ne’e aprezenta husi Ministru Turizmu, Komérsiu no Indústria, José Lucas do Carmo da Silva.

Liña Kréditu “Fasilidade Garantia Kréditu Suave” ho objetivu atu estabelese garantia kréditu ida kona-ba kréditu ne’ebé sei fó husi instituisaun bankária ba empreza mikru, ki’ik, média no boot, ho objetivu ba fixasaun ba Taxa juru remuneratória ne’ebé permite hadi’a kondisaun asesu ba kréditu husi parte empreza ne’ebé opera iha merkadu nasionál.

Liña kréditu ida-ne’e finansia husi dotasaun miliaun 50, inskrita ona iha Orsamentu Jerál Estadu ba tinan 2022 nian.

  • Share

Leave a Reply

Your email address will not be published. Required fields are marked *

error: Content is protected !!