Kestiona Osan Millaun $ 30 PNDS iha Ne’ebe ?, PM Xanana Husu Loke Auditoria

DILI, www.news-viptv.com – Primeiro Ministru Kay Rala Xanana Gusmão iha selebrasaun Programa Nasional Dezemvolvimentu Suku (PNDS) ba dala-10 kestiona osan milliaun $ 30 hosi Miliaun $ 68 ne’ebe governu anterior aloka ba iha ne’ebe, tamba ezekuta deit milliaun $ 38.

“Hau sei lao haleu hodi hare PNDS sira nia servisu tamba orsamento iha 2022 hetan $ 68 Milliaun. Maibe, $ 38 Milloes maka ezekuta. Entaun $ 30 Milloes iha ne’ebe? Osan povu nian ita tenke halo transferência no kontinuidade, tamba ne’e maka povu hili hau hamrik hanesan Primeiru Ministru,” dehan PM Xanana iha nia diskursu ba selebrasaun PNDS, Tersa (5/12/2023), iha Centro Convençoēs Dili (CCD), Dili.

Ba programa PNDS nian, xefi governu ne’e husu ba autoridade munisipiu to’o xefi aldeia atu hamutuk ho nia tau atensaun ba servisu PNDS hodi halao servisu hotu ho justu no kontribui ba nasaun nia dezemvolvimentu.

PM Xanana informa implementasaun PNDS atu fasilita dezenvolvimentu infraestrutura la’o too suku no aldeia hodi povu bele sente naroman hosi ukun rasik aan ne’e.

Xefi governu ne’e mos husu ba Ministru Administrasaun Estatal (MAE), Tomás do Rosário Cabral atu loke auditoria ba implementasaun PNDS no suspende provizoriu programa Uma Naroman ba Povu (UNP) tanba orsamentu transferénsia públiku sei hela millaun $32 ne’ebé iha konta bankária administrasaun suku nian.

PM Xanana esklarese tuir dadus ne’ebé nia simu hosi tinan 2021 osan ne’ebé tau ba PNDS hamutuk millaun $12, osan sira ne’e halo saida-saida ona tanba sá mak millaun $2 sei iha hela konta bankária, tanba sistema dehan to’o ona loron 31 dezembru lagasta osan fila ba tau fali iha orsamentu foun, la’ós iha hela ne’ebá konta bankária.

“Hau hakarak hatene osan milliaun $ 2 ne’e loloos ne’e atu bai ha saida? Tamba ne’e maka hirak ne’ebe servisu iha MAE, munisipiu tenke boo aan, tanba ita hotu iha komprimisu ida atu uza osan povu ninian gasta ho diak, ne’e hodi servi ba rai ida ne’e no povu ida ne’e,” dehan PM Xanana.

Xefe Governu informa PDNS moris hosi tinan 2013 hodi responde ba prosta rihun ne’ebé uluk suku hotu iha Timor-Leste hato’o ba IV Governu Konstitisionál la konsege resposta hotu, nune’e too tinan 2013 hamosu PNDS, hodi responde ba programa governu nian iha prosesu desentralizasaun poder lokál.

Ho implementasaun PNDS iha suku hotu- hotu, governu hahú fó konfiansa no kbiit ba autoridade munisipiu no suku atu organiza no aprende halo jestaun servisu no jestaun finanseiru hodi aprende hala’o servisu. Nune’e too implementasaun programa Desentralizasaun Poder Lokál, autoridade lokál iha ona kbiit atu hala’o servisu no implementa projetu dezenvolvimentu.

PM husu ba administrador munisipiu, postu too xefe suku sira, komesa servisu makas, tanba tinan 5 ne’e, governu nia programa komesa atu desentraliza poder too suku hotu. Tanba PNDS importante teb-tebes fó kbiit ba komunidade rasik atu hanoin saida, atu hatene saida mak prioridade iha suku ida nia laran, la’ós hadau maluk maibé hotu-hotu hetan oportunidade.

Bainhira rezolve tiha problema hirak ne’e, maka governu sei implementa desentralizasaun atu loke dalan ida di’ak maibé hahú uluk hosi PNDS tanba iha suku, no administradór postu sira mak hatene ona iha suku refere halo nusa, nune’e Governu lokál ba iha munisípiu, administrasaun finansa iha ne’ebá mós tenke kaer osan no gasta ho di’ak

Xefe Governu hatutan, dezentrasaun la’ós halo dala ida de’it maibé sei haree ba suku, postu no miunisípiu ne’ebé preparadu liu nia mak desentraliza uluk. Tanba Governu lokál tun ona ba munisípiu tenke iha ema ne’ebé hatene finansa, hatene ninia dever katak osan só sai kuandu iha programa di’ak.

Iha fatin hanesan, Ministru MAE, Tomás do Rosário Cabrál informa tinan 10 PNDS nia ezisténsia, aproveita oportunidade ne’e halo mós avaliasaun ba prosesu sira ne’ebé iha.

MAE rasik simu ona orientasaun hosi Xefe Governu Xanana hodi loke autoria ba PNDS hodi hatene klaru osan hira maka implementa ona no balun sei rai hela iha kontra suku sira nian.

“Ami simu ona orientasaun hosi primeiru ministru, auditoria ba PNDS lao hela no ministerium mos halao hela para bele hetan solusaun, atu nune’e bele trasa fali program aba oin ne’e nusa. Tanba ne’e mak iha programa balun PNDS nian ita suspende lai hanesan UNP, tanba kuaze iha milliaun $ 30 ne’ebe iha hela transferensia publiku bai ha konta administrasaun suku no ita tenke hare’e ida ne’e,” esplika Ministru Tomas.

Iha 2021 iha transferénsia millaun $21 bá iha konta bankária suku no projetu ne’e 100% ezekuta millaun $19 no no sei hela millaun $2, no orsamentu ne’ebé iha ne’e tanba transferénsia públiku ne’e ba iha konta bankária administrasaun suku nian,

Iha 2022, bá programa PNDS hetan tan transferénsia públiku millaun $65, no nia ezekusaun ne’e hela millaun $28 no tau hamutuk ho orsamentu transferénsia públiku ida 2021 ne’e mak ho totál millaun $32 mak iha hela.

Iha selebrasaun PNDS ba tina 10, Primeiru Ministru Xanana fahe mós sertifikadu apresiasaun ba suku 10 ne’ebé halo ezekusaun ba programa PNDS di’ak liu, atribui mós sertifikadu ba xefe suku sira ne’ebé la re-eleitu, no fó mós sertifikadu apresiasaun ba entidades interministeriál sira ne’ebé fó kontribuisaun maka’as ba programa PNDS no ikus taka ho atividade hasai fotogrfia ho xefe suku munisipiu 14.