Kazu Fatima, PJ Portugal Detein Timoroan 2 Sai Suspeitu no Nain 13 Sai arguidu

DILI, www.news-viptv.com – Polisia Judisiariu (PJ) Portugal detein ona sidadaun Timoroan nain 2 nu’udar suspeitu relasiona ho kazu iha Fatima ne’ebe hamate timoroan nain 1 iha 2 Junu 2024.

Sita publikasaun CNN Portugal husi Lusa PJ anunsia katak kaer ona mane na’in rua no akuza tan ema na’in 13, hafoin operasaun polísia hala’o tiha ona hafoin akontese iha Fatima.

Hafoin aprezenta ba juiz investigasaun kriminál iha Tribunal Santarem iha lokraik, suspeitu sira sujeitu ba termus identidade no rezidénsia, ho medida koasaun ba aprezentasaun “loron ida-idak” iha postu GNR besik sira-nia hela-fatin.

Operasaun polísia nian, hanaran ‘Operação Thémis’, iha Kinta-feira (13/6/2024) konsege kaptura suspeitu nain rua ba krime omisídiu kualifikadu, no na’in ba armas ne’ebe bandu no krimi partisipasaun.

Relasiona ho kazu ne’ebe involve Timoroan sira ne’e, Prezidenti Republika Jose Ramos Horta hato’o ona deskulpa ba Povu Portugal no husu halo prosesu judisiariu ba sira ne’ebé responsavel ba omisídiu ne’e, hodi propoin mós atu kansela vistu sira husi ema ne’ebé envolve no sira sai husi Timor-Leste.

Nune’e mos Primeiru-Ministru Timor-Leste, Xanana Gusmao, ho akontesementu ne’e sei taka total arte marsiais no arte ritual iha Timor-Leste.