Kalbuadi: Partidu Politiku Sira Tenki iha Objetivu Ida deit, Servi Povu, Servi Timor-Leste

DILI, www.news-viptv.com – Vise Primeiru-Ministru no Ministru Koordenadór Asuntu Ekonomia no Ministru Turismo no Ambiente, Francisco Kalbuady Lay hateten partidu politiku sira iha Timor-Leste tenki iha objetivu ida deit hodi servi povu no servi rai doben Timor-Leste.

Kalbuadi hateten lia hirak ne’e wainhira hasoru malu Vise Primeiru-Ministru no Ministru Koordenador Asuntu Sosial, no Ministru Desenvolvimentu Rural no Habitasaun Komunitaria, Eng. Mariano Assanami Sabino hodi koalia kona ba servisu governu nian iha asuntu ekonomia no social, inklui hato’o parabens ba Assanami nu’udar Prezidenti Partidu Demokratiko (PD) ba nia loron aniversariu.

Maski partidu diferenti, Kalbuadi husu ba partidu politiku sira tantu iha governu no opozisaun atu iha objetivu ida deit servi ba povu no raí doben Timor-Leste.

“Partido rua ne’e tenke servisu hamutuk ho partidu hot-hotu atu opozisaun iha mos governo atu hot-hotu nia objetivu ida deit maka servi ba povu no raí doben Timor Leste,” hateten Kalbuadi ne’ebe akompana husi Assanami wainhira koalia ba jornalista sira, Segunda (10/6/2024) iha Palacio do Governo, Dili.

Ho aniversariu PD nian, Kalbuadi espera PD hamutuk ho CNRT ne’ebe nia lidera ho PM Xanana nu’udar mos prezidenti partidu bele lori desenvolvimentu ba Timor-Leste.

“Espera ke PD sei bo’ot ba nafatin i liliu konsentra ho vizaun ida ita hotu-hotu servi ba nasaun ida ne’e ho paixão ho mos dedikasaun ne’ebe hau fiar katak PD ho CNRT hanesan ida deit desde uluk kedas,” hateten Kalbuadi.