Jogos Desportivas CPLP 2025, MJDAK Halo Inkontru Koordenasaun ho Federasaun 9

DILI, www.news-viptv.com – Ministeriu Juventude, Desportu, Arte no Kultura (MJDAK) halo inkontru koordenasaun ho federasaun desportivas 9 nu’udar modalidade ne’ebe sei compete ba Jogos Desportivas CPLP 2025 iha Dili, Timor-Leste.

Inkontru koordenasaun ne’e lidera husi Koordenador Jeral Eventos CMJD CPLP 2025 no Sekretariadu Tekniku Interministerial atual Sekretariu Estadu Arte no Kultura (SEAK), Jorge Soares Cristovão, Segunda (17/2/2025), iha edifisiu MJDAK, Lecidere, Dili.

Federasaun 9 ne’e maka atletismu, futebol, taekwondo, karate, volley praia, basket 3 on 3, xadres, tenis kampo no para-atletik.

Ba jornalista sira, Jorge Cristovão esplika, inkontru ne’ebe halo nu’udar inkontru dahuluk ne’ebe governu halo ho federasaun sira hodi koalia kona ba preparasaun ba atleta ne’ebe sei kompete no tekniku federasaun ne’ebe sei involve ba jogos CPLP 2025.

“Hanesan estadu, hanesan governu ita bele halo preparasaun hotu. Mais, koordenasaun no preparasaun ba atleta iha federasaun sira nia liman, tanba ida ne’e mak  ita kria enkontru lokraik ida ne’e atu iziji ba malu hodi halo preparasaun mais laos responsabilidade governu nian deit mais responsabilidade mos federasaun sira nian, oinsa mak atu prepara atleta sira ba iha eventu ne’e rasik,” dehan membru governu ne’e.

Liu husi inkontru ne’e, laos deit atu hateten katak Timor-Leste laos bele organiza deit eventu refere, maibe Timor-Leste nia atleta mos bele hatudu prestasaun diak iha eventu desportivas ne’e.

Prezidenti Federasaun Atletismu Timor-Leste, Afranio Xavier Amaral hateten katak sira nia federasaun pronto apoia Governu no ekipa tekniku husi CPLP sira nian ne’ebe sei sai organizador ba realizasaun eventu desportivas ne’e.

“Parte atletismu nian, ita bele suporta sira, eventu ne bele lao ho diak tuir regras ne’ebe mak iha,” dehan Afranio.

Nune mos Gabriel da Costa nu’udar Prezidenti Federasaun Taekwondo Timor-Leste hateten, federasaun pronto oferese nia mellor atleta hanesan jogos antes ne’ebe sira nia atleta hetan medalla iha Angola no Cabo Verde.

“Taekwondo laos foin primeira vez tuir eventu sira internasional, maibe tamba tuir bebeik ona, ita fiar katak, fiar ba ita nia treinador Timoroan, inklui mos fo apoio husi treinador  internasional ne’ebe hamutuk ho federasaun i sira hamutuk sempre fo apoio i hetan rezultadu diak liutan,” hateten Gabriel da Costa.

Iha jogos desportivas ne’e, kontijenti Timor-Leste hamutuk iha 101, inklui atleta nain 58 no sei konsentra nia atleta hotu ba training center hahu fulan-abril.

Ba infraestrutura, Estadiu Munisipiu Dili sei sai fatin ba modalidade futebol ho atletismu, Ginaziu Desportu Dili ba modalidade Karate, Taekwondo no Basket 3 on 3, Centro Convencoes Dili (CCD) ba modalidade Xadres, Kampo Volley Praia Lecidere ba modalidade volley praia no modalidade Tenis Kampo sei realiza iha Kampu Tenis Liceu.

Jogos Desportivas CPLP 2025 sei realiza hahu 17 to’o 27 Jullu 2025, alende jogos desportivas, Timor-Leste mos sei realiza Konferensia Ministru Juventude no Desportu pais CPLP no mos Forum Juventude CPLP.

Pais CPLP sira ne’e maka Timor-Leste, Portugal, Angola, Brasil, Cabo Verde, Guine Bissau, Guine Equtorial, Mozambique, no São Tome e Principe.