Janeiru 2022, Nain 16 Mate no 835 Sofre Tamba Dengue

DILI, www.news-viptv.com – Ema nain 16 mate tan tamba dengue  desde Janeiru 2022.

Numeru ne’e relata hosi Ministeriu Saude iha publikasaun loron 24 Janeiru tinan 2022.

Alende relata numeru mate nian, relata mos total ema nain 835 maka dadauk ne’e sofre moras refere.

Hosi numeru ne’e, maioria kazu ne’e deteta husi Munisipiu Dili ho total 570, tuir kedan Munisipiu Ermera 63, Manatuto 57, Manufahi 39, Baucau 32, Covalima 30, Bobonaro 20, Aileu 8, Ainaro 4, Liquisa 6 no Viqueque 4.

Hosi Munisipiu Dili nian, Posto Administrativo Dom Aleixo maka relata kazu a’as liu ho total kazu 283, hafoin tuir kedan husi Posto Administrativo Cristo Rei ho total kazu 110, Nain-Feto 89 no Vera-Cruz 82.

Nune’e iha tinan 2020 kazu mate hamutuk 10, iha tinan 2021 mate hamutuk 11, no iha primeira semana Janeiru tinan 2022 obitos 1 ne’ebe relata husi Munisipiu Dili.

Iha Terceira semana ne’e relata tan kazu mate iha munisipiu maka hanesan Ermera nain 4, Ainaro nain 1, no Bobonaro nain 1. Kuarta semana ne’e relata tan kazu obitos nain 2 husi Covalima no 7 husi Dili ho ida ne’e total Case Fatality Rate Nivel Nasional ho 1.9 %.

Saida maka moras Dengue ? kopia hosi publikasaun Conhese no prevene, Medicina 16 iha pajina Facebook esplika katak Moras dengue  mak moras ida ne’ebé causa/mai husi virus ida ho naran dengue, virus dengue lori husi(vetor) susuk ho naran Aedes aegypti. Susuk Aedes aegypti moris iha ambiente ho clima tropical(signifika iha de’it temporada rua hanesan bai-loron no udan) hanesan Timor.

Susuk Aedes aegypti hahú nia ciclo da vida (ciclo moris nian) bainhira susuk inan(femea) hahú tolun, fatin ne’ebe diak tebes ba susuk ne’e atu tolun mak iha be’e nalihun sira. Liu tiha loron hitu (7) tolun sira ne’e sei nakfera no forma larva (ular kiik oan ne’ebé dala barak ita hetan iha be’e lihun sira). Larva moris no sai pupa(kepompong), no liu tiha loron rua(2) nia forma kompletamente sai susuk Aedes aegypti no pronto ona atu infecta/tata ema ho virus dengue.

Virus dengue iha tipu ha’at hanesan DEN-1, DEN-2, DEN-3 no DEN-4.