Implementa Dezentralizasaun, PM Xanana Husu PAM Prepara Rekursu Humanu

DILI, www.news-viptv.com – Atu implementa dezentralizasaun iha munisipiu, Primeiru Ministru Xanana Gusmão husu ba Prezidenti Autoridade Muniispiu (PAM) atu prepara rekursu humanu.

Iha sorumutuk Konsellu Konsultivu Teritorial ne’ebe organiza hosi Ministeriu Administrasaun Estata, PM Xanana mos afirma, laos deit prepara rekursu humanu, PAM sira mos persiza halo jestaun finanseiru ho diak atu nune’e bele halo dezemvolvimentu iha kada munisipiu.

“Imi nia misaun, imi nia servisu importante liu governu sentral nian, tamba imi maka besik liu povu. Hot-hotu rona ona katak, iha tinan lima ne’e governu hakarak hahu dezentralizasaun. Katak, sei iha governu local no sei iha mos Assembleia lokal para deputadus deputadas hodi Assembleia lokal ne’e bele komesa servisu ona hare ona servisu, laos tuur deit iha parlamentu koalia barak,” hateten PM Xanana, Kinta (14/3/2024), iha City 8 Manleuana, Dili

Ministru Administrasaun Estatal, Tomas do Rosario Cabral hateten katak Konsellu konsultivu Territorial ne’e atu rona Hamutuk no saida mak atu halo iha planu asaun anual  tinan 2025.

Nia hateten, liu husi planu annuál mak sei produz orsamentu ba tinan 2025, tanba orsamentu sei aprova bazeia ba planu annuál no planu ezekusaun ne’ebé iha, nune’e husu ba PAM ida-idak atu komesa identifika projetu hirak ne’ebé munisípiu sira persiza hodi enkaixa ba iha planu annuál.

“PAM presiza halo planu orsamentu ba planeamentu urbana, hodi bele organiza ida-idak nia sidade, enkaixa mós ho projetu PNDS nian inklui família vulneravel sira ne’ebé persija governu nia tulun, nune’e mós ho servisu agrikultura sira iha munisípiu hodi bele la’o,” dehan Tomas Cabral.

Iha Planu asaun annual ne’e, PAM sira mos persiza hare mos ba área edukasaun, saúde, mercado, agrikultor no mos ekonomia.

Manuela Corte-Real nu’udar PAM Ainaro hateten, liu hosi planu asaun annual ne’e, bele identifika buat balun ne’ebe la preve iha orsamentu jeral estadu 2024, sira bele tau orsamentu tuir planu desemvolvimentu ne’ebe iha.

“Ohin ami mai iha nee ami Simu orientasaun ba preparasaun palnu anual 2025 nian, tamba 2024 ne’e Ami iha fulan Janeiro orsamento aprovado, ne’ebe ami hein deit ezekuta ,iha situasaun ida ne’ebe ita hare katak orsamento katak orsamento ne’ebe aloka iha 2024 la konsege akomada buat barak ne’ebe mak ita presisa halo iha munisipiu, maibe espera katak ho kestaun ne’ebe ita identifika bele kobre hotu iha 2025 iha proposta 2025 nian ne’e rasik,” dehan Manuela Corte-Real.