Iha 10.000 M, Felisberto de Deus Manan Medalla Silver

DILI, www.news-viptv.com – Atleta atletismu Timor-Leste, Feliberto de Deus oferese tan medalla silver (osan mutin) ba Timor-Leste hafoin hetan pozisaun daruak wainhira kompete iha numeru halai 10.000 m, Tersa (17/5/2022).

Antes iha iha 15 Maiu 2022, Felisberto de Deus mos hetan medalla hanesan wainhira kompeet iha numeru 5.000 M.

Iha Sea Games 2021 Vietname, atleta hosi Munisipiu Ermera ne’e rejistu nia an hodi kompete mos iha numeru 1.500 m. Maibe, iha numere ne’e (1.500 m), Felisberto de Deus lakon iha nia kompetisaun maski konsege iha lina dahuluk durante putar dala tolu ona, maibe iha besik finish nia lakon hosi atleta nasuan seluk nian.

“Medalla daruak ba kontijenti Timor-Leste, iha SEA Games Vietname. Obrigado barak Felisberto de Deus,” hakerek Prezidenti CDTL, Macario Sanches iha nia pajina privadu hodi kongratula ba prestasaun Felisberto nian ne’e.

Ho medalla osan mutin ne’e, Timor-Leste dadauk ne’e foin kolekta medalla 2 no kontinua iha lista numeru 11 iha nasaun ne’ebe hetan ona medalla.

Medalla osan mutin ne’e, Felisberto de Deus hetan liu hosi numeru halai 5000 M ne’ebe nia kompete ba. Iha numeru ne’e, medalla osan mean (gold) hetan hosi atleta Vietnam Lai Nguyen Van no medalla osan metan (bronze) hetan hosi atleta Filipina, Sonny Wagdos.

“Nudar Prezidente sente kontente ba rezultadu idane no husu nafatin modalidade sira seluk atu disiplina nafatin atu nune bele fo rezultadu diak. Fo mos parabens no obrigado ba treinador no Federasaun Atletizmu nebe prepara atleta sira ho diak,” komentariu Prezidenti Condeferasaun Desportu Timor-Leste (CDTL), Macario Sanches ba www.news-viptv.com minutu hira liu ba.

Macario Sanches mos optimista katak atleta Taekwondo mos sei oferese medalla ba Timor-Leste nian.

Ho prestasaun Felisberto de Deus nian, Prezidenti Federasaun Atletismu Timor-Leste, Afranio Xavier Amaral senti orgullu ho medalla osan mutin (silver) ne’ebe nia atleta hetan.

“Klaru orgullu tan ba primeira vez modalidade atletismo hetan medala osan mutin ho kompetitivu tebes, laos liu husi kompromi,” deklara Afranio.

Felisberto de Deus iha 17 Maiu sei kompete dala ida tan iha numeru 10.000 no espera iha numeru ne’e, Afranio espera nia atleta bele oferese tan medalla ba Timor-Leste.

Modalidade atletismu iha SEA Games Vietnam haruka nia atleta nain 4. Alende Felisberto de Deus ne’ebe kompete iha numeru 1.500 m, 5.000 m, no 10.000 m, iha mos Roberto Belo Amaral Soares (800m no 1.500m), Manuel Belo Amaral Ataide (400m no 800m) no Rubia Fatima Amaral Martin’s (5.000m no 10.000m).

Iha eventu ne’e, alende modalidade atletismu,  Timor-Leste haruka mos atleta hosi modalidade Taekwondo, Karate-do, Boxe,  Natasaun, Futebol no Halterofelismo.