Hasoru Malu ho Park Jin, TL-Koreia Sul Koalia Koperasaun Bilaterais

PHNOM PENH, www.news-viptv.com – Ministra Negosiu Estranjeiru no Koperasaun, Adaljiza Magno kontinua halo inkontru bilaterais ho Ministru Negosiu Estranjeiru sira ne´ebe partisipa Forum Rejional ASEAN (ARF), inklui Ministru Negosiu Estranjeiru Koreia Sul, ParK Jin.

Iha inkontru refere, ministru nasaun rua kontinua koalia koperasaun bilaterais ne´ebe lao hela hanesan mobilidade traballador Timoroan sira iha Koreia Sul, interkambiu cultura nian, no programa bolsu estudu nian.

“Ministra Magno hato´o obrigado ba Governu Koreia Sul ba suporta ne´ebe durante ne´e fo ona Timor-Leste no kongratula ba nasaun rua nian relasaun diplomatiku ne´ebe lao ona durante tinan 20,” hakerek komunikadu imprensa ne´ebe redasaun simu hosi Media MNEK.

Iha hasoru malu ho Park Jin, Ministra Magno mos husu suporta Koreia Sul atu apoia Timor-Leste nia candidatura ba Konsellu Diretus Humanus ONU nian.

Alende ne´e, Ministra Magno mos esplika kona ba prosesau adezaun Timor-Leste ba ASEAN, inklui vizita foin lais ne´e hosi Misaun Esploratoriu ASEAN ba Timor-Leste.