Hases Povu Husi Risku Dezastre, SEATOU Halo Eviksaun ba Uma iha Fomento II

DILI, www.news-viptv.com – Lamentasaun ne’e hato’o husi Judith de Fatima, komunidade Fomentu II ne’ebe nia uma mos hetan despezu administrativu ou eviksaun husi dezisaun derepenti  Sekretariu Estadu Asuntu Toponomia no Organizasaun Urbano (SEATOU), Germano Santa Brites Dias ba uma kain hamutuk 288 ne’ebe hela iha area ninin mota Comoro Dili nian.

Judit de Fatima hateten, komunidade sira ne’ebe hela iha area refere laos tamba sira nia hakarak, maibe situasaun ba kampu traballu iha foho laiha maka obriga sira hodi mai hotu iha Kapital Dili.

Nune’e mos Felizara Xavier senti triste ho dezisaun SEATOU ne’ebe la fo tempu ba sira hodi sobu ida-idak nia uma no aproveita dezastre naturais ne’ebe akontese hodi hasai komunidade hotu ne’ebe hela ona tinan barak iha area refere.

Lamentasaun hanesan hato’o husi Mariano da Costa Alves, nain ba Café Atsabe ne’ebe sira la hetan karta notifikasaun hodi sai antes governu sobu sira nia fatin.

Maski hetan efiksaun, nia sei kontinua nia atividade negosiu iha fatin rua seluk ne’ebe nia halao iha Kapital Dili.

Domingos Mendonca Sarmento, hanesan Xefi Aldeia Fomentu II, labele halo buat ida ba nia komunidade maski esforsu ona koalia ho autoridade Governu sira, no husu ba nia komunidade atu kumpri dezisaun governu hodi hases sira husi dezastre no apoia ba programa dezemvolvimentu governu nian.

SEATOU hamutuk ho ekipa inter-ministerial halo eviksaun ba area refere hafoin uma kain 20 iha loron 1 Janieiru hetan sobu husi mota bo’ot, no kontinua uma 8 maka hetan tan estragus iha loron 2 Janieiru.

Eviksaun ne’ebe SEATOU halo ne’e hahu kedan iha loron 2 Janieiru no prepara mos transporte ba ajuda komunidade muda sira nia sasan husi area refere, inklui lori ba munisipiu orijin komunidade sira nian.

Iha eviksaun ne’e mos, Primeiru Ministru Kay Rala Xanana Gusmao vizita area refere hodi hare situasaun real no hase komunidade sira ne’ebe hela iha area refere.