Hamosu Deklarasaun Dili, g7+ Nomea PR Ramos-Horta Enviadu ba ONU

DILI, www.news-viptv.com – Timor-Leste susesu realiza inkontru ministerial g7+ ho nia rezultadu maka hamosu rezolusaun Dili ne’ebe aseita husi nasaun membru sira, hafoin termina nia inkontru ba loron daruak, sabadu (12/4/2025), iha Dili.   

Iha pontu 7 importante ne’ebe hamosu iha rezolusaun Dili maka 1) Solidariedade ho Nasaun sira iha Krize nia laran no Kompromisu ba Paz, 2) Avansa Aprendizajen no Kooperasaun entre maluk sira, 3) Mobiliza Apoiu Globál no Asegura Alíviu Dívida ba Estadu sira ne’ebé Afetadu hosi Konflitu, 4) Hametin g7+ liuhosi Konsolidasaun Institusionál, 5) Hametin Lideransa g7+ iha Palku Globál, 6) Estabelese Prezidente no Vise-Prezidente foun sira, no 7) Rekoñesimentu no Dalan ba Oin.

Iha Rezulasaun ne’e, espresa mos solidariedade klean ba nasaun no komunidade hotu-hotu ne’ebé sofre hosi funu, agresaun, no dezastre naturál sira, inklui reafirma kompromisu atu apoia esforsu sira harii-dame nian, inklui mediasaun, rekonsiliasaun, no prevensaun konflitu proativu liuhosi sistema alerta antesipada ne’ebé hametin nu’udar instrumentu esensiál sira hodi prevene konflitu no haburas koezaun nasionál.

Sekretariu Jeral g7+, Helder da Costa kompromete atu hametin prezensa no advokasia iha ONU, inklui Konsellu Seguransa ONU nian, no mós iha instituisaun finanseira internasionál sira-nia laran no banku dezenvolvimentu multilaterál sira.

Nomeia Prezidente Timor-Leste, S.E. Dr. José Ramos-Horta, nu’udar enviadu espesiál ba mediasaun no ami sei husu ba Sekretáriu-Jerál Nasoens Unidas atu fó apoiu ba nia serbisu ba pás no rezolusaun konflitu.

Resulasaun ne’e mensiona prezidensia organizasaun ne’e iha tinan 2026 sei asumi husi Illa Salomão ba mandatu tinan rua. No Repúblika Demokrátika Kongo no Libéria sei sai hanesan Vise-Prezidente sira ba períodu hanesan.

g7+ hato’o apresiasaun kle’an ba Governu Timor-Leste ne’ebé sai uma-na’in ba Sorumutu Ministeriál ba dala VI no ba ninia kompromisu no apoiu ne’ebé la nakdoko ba g7+.