Hametin Sistema KSP, Japaun-UNFPA Hadia SSK 20

DILI, www.news-viptv.com – Hodi hametin sistema Kuidade Saude Primaria (KSP) ba kuidadu saude inan no bebe foin moris, organizasaun ONU ne’ebe hare’e assuntu populasaun, UNFPA ho fundus hosi Governu Japaun hamutuk miliaun US$ 7.5 sei hadia Sentru Saúde Komunitáriu (SKS) hamutuk 20.

Fundus ne’ebe Governu Japaun fo ba UNFPA ne’e halo liu hosi nota entendementu ne’ebe asina hosi Embaixador Japaun, Tetsuya Kimura ho Engkaragada UNFPA iha Timor-Leste, Domingas Bernardo, Kuarta (6/3/2024), iha Hotel Timor, Dili.

Iha nia intervensaun, Embaixador Japaun, Tetsuya Kimura hateten, Japaun servisu iha Timor-Leste iha saúde nian no saúde infantil durante tinan barak ona nune’e Japaun hare mos katak UNFPA nia servisu rasik liga ho saúde entaun koopera hamutuk entre UNFPA ho Japaun hodi hadia mos sentru saúde sira iha Timor-Leste.

“Projeto ida ne’e servisu atu hadia Sentru Saude Komunitaria rua-nulu (20) ho objetivo atu hametin sistema Kuidadu Saúde Primária ne’ebe eziste ona hodi fornese kuidadu saúde inan no bebé foin moris ho kualidade inklui kuidadu antenatal no Kuidadu pos-natal iha munisípiu sanulu-resin-rua (12),” dehan Tetsuya Kimura.

Projeto ne’e, esplika Embaixador Kimura, sei inklui mos fornese ekipamentus tanto mediku no laos mediku no formasaun kapasitasaun ba pessoal mediku sira.

Embaixador Japaun vizita ona instalasuan rua hanesan iha Liquisa no Atauru. Tamba ne’e Embaixador Kimura fiar katak liu husi kooperasaun projetu ne’e sei hamenus mortalidade no mobilidade inan no perinatal iha Timor Leste no sei lori  salvasaun ba feto sira nia moris molok fo partu ba bebé ida.

Ho apoia fundus ne’e, UNFPA mos orgullu tebes ho Governo Japaun no povu Japaun tamba parseiru ne’e importante tebes atu hadia kualidade servisu emenjensia obstretiku no neonatal baziku ne’ebe ultimamente bele salva moris no hadia inan no bebé sira iha Timor Leste.

“Ohin loron ita mai asisti serimonia ida ne’e, ho tulun husi Governo Japaun ho intervensau save husi projetu ne’e sei haforsa kapasidade fasilidade saúde (20) ka maternidade iha município (12) inklui RAEOA, ne’ebe sei eleva sira nia nivel sai BEMONC (Sentru Kuidadus de emergência obstestrika no Neonetal baziku) atu fornese kuidadu saúde materna no Neonetal ne’ebe komprensivu no integradu ba inan feton sira,” dehan Domingas Bernardo.

Ho fundus ne’ebe fornese, inisiativa ida ne’e ho objetivu partikularmente atu hatún mortalidade materna no sei impaktu ba feto ne’ebé ho idade reprodutiva hamutuk 117,620 no estimasaun ba feto isin-rua kada tinan hamutuk 20,616.

Hola prezensa ba assina entendimentu ne’e Vise-Primeiru Ministru, Ministru Koordenadór Assuntos Sosiais, Ministro do Desenvolvimento Rural e Habitação Comunitária Eng. Mariano Asanami Sabino, Vise Ministro Fortalesimentu Institusional da Saúde, Jose dos Reis Magno, no Prezidente Autoridade Municipal husi Munisipiu 12 inklui  RAEOA.