Hametin Relasaun Bilateral, PR India Droupadi Murmu Vizita Timor-Leste

DILI, www.news-viptv.com –  Iha nia vizita ne’e, Prezidenti Drupadi Murmu simu dereta husi Prezidenti Republika Jose Ramos Horta ho guarda de onra iha Palasiu Prezidensial.

Vizita Prezidenti Murmu nu’udar vizita dahuluk ba Timor-Leste desde nasaun rua ne’e halo relasaun bilateral iha 2003.

Durante hasoru malu, xefi estadu rua ne’e koalia kona ba relasaun bilateral entre nasaun rua no koalia assuntu kooperasaun futuru nian iha setór krítiku sira inklui teknolojia, agrikultura, saúde, defeza, infraestrutura, no edukasaun.

Xefi Estadu India ne’e mos fo nia apoia makas ba Timor-Leste nia adezaun ba ASEAN iha tinan 2025.

Entretantu Timor-Leste deklara, sei apoia India iha nia adezaun permanente iha Konsellu Seguransa ONU nian.

Ho relasaun bilateral ne’ebe iha ona, Timor-Leste no India sei harii nia embaixada iha ida-idak nia kapital hodi loke dalan ba relasaun diplomátiku sira ne’ebé di’ak liután.

Hafoin enkontru, Prezidente Ramos-Horta konfere ba Prezidente Murmu Grande Kolár Orden Timor-Leste nian, hanesan onra aas liu iha nasaun ne’e.