Halo Dialogu ho Partidu Apoiantes Sira, Horta Sei Hamutuk ho Governu Kria Kampu Servisu

LIQUISA, www.news-viptv.com – Servisu ho governu hodi tau matan ba edukasaun, saude no joventude hodi kria kampu servisu sai programa ida ba kandidatu Prezidenti Repubika Jose Ramos Horta nian.

Liu hosi nia kampana prezidensial ho modelu dialogu ne’ebe halao iha Sede Partidu CNRT Munisipiu Liquisa hamutuk ho estrutura partidu politiku aliadu no movimentu sira ne’ebe apoia nia kaniddatura, Ramos Horta promote sei realiza programa ne’e wainhira nia eleitu ba prezidenti republika.

Antigu prezidenti republika periodu 2007-2012 ne’ebe iha ona esperensia barak wainhira asumi kargu nudar xefi estadu deklara mos katak nudar prezidenti republika nia sei la taka atividade arte marsiais ne’ebe maioria involve joventude sira no kontinua sei autoriza atu governu mos apoia ba arte marsiais nia atividade.

Nudar jerasaun foun ne’ebe iha vizaun luan ba futuru estadu nian, figura Ramos Horta, tuir Prezidenti Mariano Assanami Sabino, premiadu nobel da paz ne’e hatudu ona nia lideransa no kapasidade wainhira sai prezidenti republika hodi asegura estabilidade governasaun iha nia mandatu, laos hanesan governasaun atual ne’ebe failla kria kampu servisu ba povu.

Entertantu Sekretariu Jeral Partidu CNRT, Francico Kalbuadi Lay lee sai mesajem Prezidenti Partidu CNRT, Xanana Gusmao ne’ebe labele hola prezensa hamutuk Ramos Horta tamba halo hela servisu iha Oekusi, maibe hato’o nia agradesementu ba povu Liquisa ne’ebe fo ona votos maioria ba Ramos Horta iha volta dahuluk.

Hola prezensa mos iha dialogu ne’e maka Prezidenti Partidu Sosialista de Timor, Avelino Coelho, Presidenti Patifor Gregorio Saldanha, Prezidenti PUDD, Prezidenti PDRT, Agustinho Gomes, Lideransa Partidu Frenti Mudansa, Jose Luis Guterres, eis kandidatu prezidenti republika Anacleto Bento, Hermes Barros no Angela Pires no kuadrus estrutura nasional no munisipiu partidu aliadu sira.

Reportagem: Gantry Meilana