Gradua ba Warga, PSHT La Autoriza Nia Membru ba Rai Liur

DILI, www.news-viptv.com – Organizasaun Arte Marsiais Persaudaraan Setia Hati Terate (PSHT) hasai ona dezisaun katak sei la autoriza tan nia membru graduadu warga nian ba iha rai liur.

Reprezenta Prezidenti PSHT no nudar Fundador, Joao Martins Saruntu informa hahu tinan ne’e, PSHT sei gradua nia membru sira sai warga iha deit Timor-Leste.

Ho dezisaun governu nian, ne’ebe autoriza ona grupu arte marsiais tolu hanesan PSHT, KORK no IKS hodi re-ativa fali nia atividade, ba oin Ikatan Kera Sakti-Putra Timor-Leste sei fo sansaun makas to’o hasai hosi organizasaun karik involve iha aktus krimi.

Sekretariu estadu Juventude no Desportu Abrao Saldanha fo hanoin nafatin ba grupu arte marsiais tolu ne’e atu kumpri regulamentu ne’ebe iha ona no sei la autoriza atividade ida ka treinamentu iha fatin ida ho illegal.

Iha 26 Maiu 2022, iha Ginaziu Desportu Dili, Primeiru Ministru Taur Matan Ruak offisialmente re-ativa atividade ba grupu arte-marsiais tolu ne’ebe taka durante tinan 10 resin.

Iha seremonia re-ativa ne’e, grupu arte marsiais tolu ne’ebe governu re-ativa nia atividade hatudu kedan sira nia atrasaun nudar atividade desportu arte-marsiais nian.

Reportagem: Leonito de Fatima