Governu Tenki Kontrola Prezensa Negosiante Xineza

DILI, www.news-viptv.com – Prezensa negosiante Xineza Timor-Leste ne’ebe aumenta bebeik bele fo ameasa ba setor privadu Timoroan sira, tamba ne’e husu ba governu atu bele kontrola.

Iha plenaria Parlamentu Nasional, Segunda (9/12/2024), deputada bankada CNRT, Cedelizia faria dos Santos observa katak sei governu la kuidadu ho prezensa Loja Xina sira, osan Timor-Leste sei sai hotu ba rai liur.

“Loja Xineza barak tebes, loja barak no hanesan, sirkulasaun orsamentu ne’e ita la hatene,osan iha rai laran deit ga ba rai liur. Hanesan loja ida hau ba Timor Plaza, hau hakarak selu ho kartaun, sira lakohi, dehan cash det no nain dehan lakohi loke banku iha Timor-Leste,” levanta Deputada Cedelizia.

Tamba ne’e atu kontrola, nia husu ba Ministeriu Komersiu no Industria ho Banku Central atu hare kestaun ne’e ho seriu, inklui ba sirkulasaun osan.

“Banku desenvolvimentu bainhira mak loke, tenki apoia emprezariu local fo apoiu, banku sentral kontrola osan sira ne’e, hau ba banku sira lori osan bo’ot,” dehan deputada ne’e.

Nune’e mos ho Deputada FRETILIN, Oscar Lima ne’ebe hateten, wianhira govenru la tau atensaun duni ba negosiante Xineza sira, bele hamate setor privado sira, liliu negosiante kiik sira ne’ebe labele kompete ho sira.

“Xina sira halo negosiu iha Timor demasiadu, favor ida ita bo’ot sira hare lei ka, hare saida maka bele halo para pilemenus iha populasaun nia leet ne’e sira labele halo tan loja iha ne’eba, se hanesan ne ita nia maluk Timoroan sira halo kios sira ne’e mate, ne’e hau hateten, ita la konsege konkore ho sira,” dehan Oscar Lima.

Ho preokupasaun ne’e, Oscar Lima husu ba governu atu kria lei hodi regula negosiante Xina sira nune’e labale hamate negosiante Timoroan sira.

“Governu tenki hare assuntu ne’e, tenki fo benefisiu ba ita nia emprezariu Timoroan sira halo kios, se lae bele oho ita nia maluk emprezariu Timoroan sira, foho sira mos sira hahu tama,” dehan deputadu FRETILIN ne’e.

Laos deit kestaun negosiante Xineza, Deputadu CNRT, Natalino dos Santos mos husu ba instituisaun kompetente atu hare mos kualidade sasan ne’ebe fan husi Xineza sira tamba barak maka laiha kualidade.

“Sasan hanesan deit, la kualidade, aat lalais no bele estraga ambiete, aumenta lixu. Governu hare ba Lei investimentu, AEFELSA hare sasan sira ne’ebe laiha kualidade,” dehan Natalino.