Governu Preve Osan Miliaun US$ 36 ba Estrada Lautém

LAUTÉM, www.news-viptv.com – Governu iha dezemvolvimentu estrada Munisipiu Lautém nian preve ona osan miliaun US$ 36.

Orsamentu ba dezemvolvimentu estrada Lautém ne’e fo sai husi Primeiru Ministru Kay Rala Xanana Gusmão no Ministru Obras Públikas (MOP), Samuel Marçal iha sosializasaun bá projetu konstrusaun estrada bá populasaun afetadu sira iha salaun GOR Lospalos-Vila, Munisípiu Lautém, sábadu (01/03/2025).

Osan miliaun US$ 36 ne’e, MOP preve iha osan ba mega projetu nian ne’ebe fahe ba estrada hosi Postu Administrativu Lautém bá Lospalos-Vila hamutuk kilómetru 28 ho totál orsamentu millaun US$ 22 no estrada hosi Postu Administrativu Lautém bá Suku Com hamutuk Kilómetru 20 ho orsamentu millaun US$ 14.

Alende estrada nian, ba Munisipiu Lautem, MOP mos tau osan ba Projetu Bee Moos ho orsamentu millaun US$ 17 ne’ebé sei fornese bá benefisiáriu uma-ka’in 3.400.

Iha komunikadu imprensa ne’ebe redasaun asesu, Primeiru-Ministru, Kay Rala Xanana Gusmão iha intervensaun espresa sentimentu emosionál katak, nia iha relasaun espesiál ho Lospalos, tanba ne’e husu populasaun atu fó apoiu totál bá programa Governu nian hodi implementa lalais projetu boot tolu ne’e, nune’e populasaun bele asesu bá estrada no Bee Moos.

Kay Rala Xanana Gusmão observa katak, problema prinsipál populasaun nian maka infraestrutura bázika hanesan estrada, tanba ne’e maski fazeadamente maibé IX Governu Konstitusionál prioritiza projetu konstrusaun estrada iha tinan ida-ne’e.

Líder nasionál ne’e dehan, kualkér Governu tenke tau prioridade bá dezenvolvimentu tanba ukun-an ne’e povu mak sosa ho ruin no ran, tanis, halerik, terus no mate.

“Husu populasaun munisipiu Lautém tomak atu kolabora ho Governu hodi implementa lalais projetu estrada ne’e no labele iha impendimentu ruma,” hateten PM Xanana ba komunidade sira.

Apela mós bá kompañia sira ne’ebé kaer obra tolu ne’e tenke servisu ho kualidade no responsabilidade tanba osan ne’ebé utiliza ne’e osan povu nian.

Iha fatin hanesan, Ministru Obras Públikas (MOP), Samuel Marçal hateten, molok implementa projetu tolu ne’e Governu iha devér atu halo sosializasaun, nune’e mós Governu hakarak rona hosi komunidade afetadu sira maibé buat ne’ebé importante liu maka tenke kolabora atu nune’e projetu ida-ne’e bele realiza lalais.

“Favor labele halo impedimentu no espera katak, povu munisipiu Lautém sei sai ezemplu ida ne’ebe diak liu ba munisipiu sira seluk. Ita hein katak iha fulan maiu tinan ne’e sei konvida primeiru ministru mai hamrik iha povu Lautém nia-oin hodi hao lansamentu ba konstrusaun estrada ne’e,” dehan Ministru Samuel Marçal.

Nune’e mós Prezidente Autoridade Munisipál Lautém, Mélio de Jesus lori povu munisípiu ne’e nia naran deklara prontu atu simu dezenvolvimentu tanba tempu naruk nia laran povu Lautém terus bá estrada.

“Husu komunidade atu rona didiak esplikasaun ne’ebe hato’o hosi Ministru Obras pUblikas no fila ba uma hatutan ba komunidade ne’ebe la marka prezensa iha sosializasaun ida ne’e, nune’e labele hamosu dezintendimentu ba prosesu konstrusaun estrada ne’e,” dehan Melio de Jesus.

Governadór Banku Sentrál Timor-Leste (BCTL), Helder Lopes hanesan Lospalos-oan apela bá komunidade atu koopera tanba tinan ida-ne’e Lospalos sai espesiál iha ne’ebé Governu oferese projetu boot tolu kedan no ida-ne’e la fásil tanba iha munisípiu barak mak seidauk hetan oportunidade hanesa ne’e.

“Agradese ba primeiru ministru tanba iha tinan ida ne’e oferese projetu boot tolu ne’e, no hein katak bainhira implement abele korre ona sifrimentu ne’ebe tinan barak povu infrentra,” dehan Helder Lopes.

Durante sesaun husu no hatan, autoridade lokál no komunidade afetadu sira deklara prontu atu koopera ho Governu no prontu atu simu dezenvolvimentu maibé husu mós bá Governu atu bele hanoin netik komunidade bainhira afeta bá uma no kintál.

Partisipa iha sosializasaun ne’e maka Ministru Justisa, Sérgio da Costa Hornai, Governadór Banku Sentrál Timor-Leste (BCTL), Helder Lopes, administradór postu sira, autoridade lokál no populasaun afetadu sira.