Governu Kongratula Musulmanu Timor-Leste ba Selebrasaun Idul Adha

Dili, www.news-viptv.com – Maski Islam nu’udar relijiaun minoria, Governu fo kongratulasaun ba musulmanu hotu iha Timor-Leste ne’ebe selebra loron Idul Adha, Segunda (17/6/2024), iha Mesquita An-Nur Kampung Alor, Dili.

Primeiru Ministru Interinu, Mariano Assanami Sabino hateten, hodi respeita ba loron bo’ot ba komunidade musulmanu refere, Timor-Leste tau loron refere ba feriadu nasional hanesan mos loron bo’ot relijiaun seluk.

Iha nia prezensa ba loron bo’ot refere, Assanami husu nafatin atu ba komunidade musulmanu liliu sira nia lideransa relijioza atu kontribui mos ideia ba desenvolvimentu nasional Timor-Leste nian, inklui ajuda governu hodi forma karakter nia ema sira hodi sai ema ne’ebe sivilizadu no hatene respeita malu.

Boaventura da Silva nu’udar Sekretariu Jeral Konsellu Superior Musulmanu Timor-Leste hateten, nia parte konkorda ho hanoin Governu ba formasaun karakter ema nian, katak Musulmanu mos hakarak Timoroan hotu moris respeita malu.

Iha Selebrasaun Idul Adha tinan ne’e, husi balada ne’ebe oferese, nia naan sira sei fahe ba ema ne’ebe kbit laek.

Total hamutuk iha karau 17 no bibi 13 maka sira oferese ba selebrasaun Idul Adha tinan ne’e.