banner 1000x250

Governu Ho Familia Deside Funeral MJ iha Semiteriu Bekusi

  • Share
Espousa Ministru Justisa, Matebian Amandio de Sá Benevides ho triste hateke ba mate isin matebian. Foto: Julião Belem / VIP TV
banner 728x90

Dili, www.news-viptv.com – IX Governu Konstitusional hamutuk ho familia Ministru Justisa, matebian Amandio de Sá benevides deside ona atu halot ka halo funeral iha Semiteriu Bekusi, Dili.

Vise Primeiru-Ministru, Mariano Assanami Sabino. Foto: Julião Belem / VIP TV

Vise-Primeiro Ministru no Ministru Koordenasor Assuntu Social e Ministro do Desenvolvimento Rural e Habitação Comunitária, Mariano Assanami Sabino prosesu funebre ba matebian Amandio Benevides sei organiza hosi Ministeriu Administrasaun Estatal.

banner 1000x250

“Família parte Ainaro no Dili nia aseita ona atu hakoi iha Dili ne’ebe sei organiza husi Ministru Administrasaun Estatal mak sei organiza pareser sei hakoi iha aban loraik (Segunda ohin, red) iha Semiteriu Bekusi. Ida ne’e serteza ona tamba kombina ona família ho Governu tamba ne’e ita nafatin hato’o sentidu kondolensia klean ba família matebian faluk no oan kiak katak sira nia aman ne’e eroi,” informa Mariano Assanami Sabino ba jornalista sira iha residensia matebian, Kampung Baru, Comoro, Domingo (21/01/2024).

Xefe Gabinete Ministru Justisa Albertina Santa afirma, prosesu funebre sei hahu uluk lori matebian ba Sede CNRT iha Bairo Grilos, no kontinua ba edifisiu Ministeriu Justisa fatin ne’ebe matebian haknaar an ba nu’udar membru governu.

Nu’udar Xefi Govenru, Kay Rala Xanana Gusmão sente triste no lakon ema pontensiál ida ne’ebé assume kargu importante nu’udár Ministru Justisa iha IX Governu Konstitisionál, Amândio de Sá Benevídes, ne’ebé husik ona mundu, iha Sábadu 20 Janeiru 2024.

PM Xanana Gusmão hakuak espousa matebian. Foto: Media PM

“Triste tebes tanba ha’u asiste, bainhira tun hosi aviaun ha’u sei konversa hela ho sira hotu, ha’u ko’alia mós ho Ministru Amândio. Ha’u husu sira hotu nia kondisaun. Ami na’in-rua sei hamnasa hela, kaer liman, ami la’o hamutuk tama sala VIP, derrepenti hetan atakasaun. Ami hotu preokupadu,” Xanana Gusmão espressa sentimentu triste bainhira akompaña direta matebian iha Hospitál Nasionál Guido Valadares (HNGV).

Saudozu moris iha 16 Jullu 1964, iha Munisipiu Ainaro. Remata nia lisensiatura iha Direitu Konstitusionál iha Universidade Nusa Cendana Kupang, Kupang – Republika Indonézia, iha tinan 1990 fila fali ba Timor-Leste hodi servisu nu’udar advogadu privadu iha Dili, atividade profisionál ida-ne’ebé nia hala’o husi tinan 1991 to’o 1993.

Iha 1 Jullu 2023 hetan konfiansa hosi Primeiru-Ministru Kay Rala Xanana Gusmão no simu posse hosi Prezidente Repúblika, José Rmaos-Horta nu’udar Ministru Justisa, IX Governu Konstitisionál.

Ministru Justisa, matebian Amandio de Sá Benevides.

Saudozu iha ninia peregrinasaun asumu knaar nu’udar funsionáriu públiku hosi tinan 1993 to’o 1999. Durante períodu ida-ne’e, nia hala’o kursu oin-oin iha área administrasaun no jestaun publika.

Durante Administrasaun Tranzitoriu Nasoins Unidas nian (UNTAET), nia sai hanesan Prokuradór iha Ministeriu Publiku Timor-Leste nian dahuluk ida-ne’ebé iha pozisaun iha Administrador Sérgio Vieira dé Mello nia oin, iha Fevereiru 2000.

Saudozu asumu mós knaar nu’udar Advogadu Jerál ba Krime Komún iha loron 16 fulan-outubru tinan 2001, hodi troka Longuinhos Monteiro, ne’ebé asume pozisaun nu’udar Prokurador Jerál.

Maski hetan nomeasaun durante períodu UNTAET, ho aprovasaun ba Dekretu-Lei no. 1/2002, iha rejime transferénsia sistema judisiáriu nian, nia nafatin iha pozisaun to’o 2005.

Iha tinan ne’ebé hanesan, nia remata ona kursu pos-graduasaun iha Estudu Anti-Korrupsaun iha Fatin Universidade iha Hong Kong, Republika Popular Xina. Entre tinan 2004 no 2005 nia kaer pozisaun nu’udar Komisariu Komisaun Nasional Eleisaun (CNE).

  • Share

Leave a Reply

Your email address will not be published. Required fields are marked *

error: Content is protected !!