Governu Aprova Renerasaun Mensal Ilikida US$ 1,750 ba PAM

DILI, www.news-viptv.com – IX Governu Konstitusional iha sorumutuk Konsellu Ministru aprova ona projetu Dekretu Governu, ne’ebé aprezenta husi Ministru Administrasaun Estatál, Tomás do Rosário Cabral, ne’ebé estabelese remunerasaun ba Prezidente Autoridade Munisipál (PAM).

“Prezidente Autoridade Munisipál sei iha diretu ba remunerasaun mensál ilíkida ho valór US$ 1,750,” hakerek komunikadu imprensa ne’ebe publika iha portal official governu nian, hafoin sorumutuk Konsellu Ministru, Kuarta (10/1/2024), iha Palacio do Governo.

Diploma ida-ne’e tuir prevee ona iha n. 2 husi artigu 24.º Dekretu-Lei n.3/2016, loron 16 fulan-marsu, tuir redasaun ne’ebé aprezenta husi Dekretu-Lei n.84/2023, loron 23 fulan-novembru, hodi estabelese remunerasaun ba Prezidente Autoridade Munisipál sira haree ba grau responsabilidade ne’ebé nu’udar sira-nia responsabilidade, no sei fó impulsu ba prosesu desentralizasaun territoriál, ne’ebé sei implika aumentu ba rekursus materiál, orsamentál no umanus ne’ebé sei koloka  iha sira-nia responsabilidade.

Dekretu Governu ida-ne’e sei tama iha vigór iha loron tuir mai hafoin ninia publikasaun no sei hahú vigora iha loron 1 fulan-janeiru tinan 2024.  Revoga ona Dekretu Governu n. 3/2016, loron 6 fulan-abril, ne’ebé altera husi Dekretu Governu n. 20/2021, loron 11 fulan-agostu.