Funsionariu Publiku Rihun 4 Tama Ona Idade Reforma

DILI, www.news-viptv.com – Komisaun Funsaun Públiku (KFP) relata katak hamutuk iha funsionariu publiku rihun 4 ne’ebe tama ona ba idade reforma nian wainhira Konsellu Ministru aprova tinan 60 ba reforma nian.

Prezidente KFP, Agostinho Letêncio de Deus informa assuntu ne’e ba media hafoin relata rezultadu diagnóstiku no planu reforma administrasaun públika bá Primeiru-Ministru (PM), Kay Rala Xanana Gusmão iha Palácio do Governo, Tersa (25/06/2024).

KFP, esplika Agostinho, sei foti medidas ba funsionariu publiku sira ne’ebe kontinua indisiplinar iha nia servisu fatin hodi la kumpri regras ne’ebe iha.

KFP mós iha preokupasaun boot kona-bá problema prinsipál balun liu-liu ajente administrasaun públika ne’ebé rekruta hela hosi kada liña ministeriál tantu ajente administrasaun ka kazuál sira ne’ebé mak la iha definisaun klara no ladún define funsaun loloos, montante salariál hira mak nia tenke hetan no seluk-tán.

Bazeia bá rezultadu diagnóstiku ne’e, KFP detekta katak, seidauk iha kontrolu di’ak bá tamañu ka totál funsionáriu públiku nian. Alende ne’e, iha sistema Funsaun Públika ho naran SIGAP, rezita funsionáriu hamutuk 37.000 maibé iha parte salariál nian rejista 50.000-resin mak kada-fulan asesu bá saláriu.