Evita Poder Politiku no Ekonomia, Media Tenki Iha Konsellu Redasaun

DILI, www.news-viptv.com   –  Hodi evita intervensaun oioin husi poder politiku no ekonomia, Sekretáriu Estadu Komunikasaun Sosiál (SECOMS), Expedito Dias Ximenes hateten, media ida tenki iha konsellu redasaun.

SECOMS hateten lia hirak ne’e ba jornalista sira hafoin halo inkontru ho media nain no xefi redasaun sira, Segunda (17/3/2025), iha Palacio do Governo, Dili.

“Hau husu ba atu bele evita intervensaun poder politika ho poder ekonomiku, media hotu-hotu tenke iha konsellu redasaun atu evita ema seluk no poder politiku sira no poder ekonomiku sira, hodi bele interven iha produto jornalista, i ohin sira konkorda i sira hateten katak kuaze media hotu-hotu ne’ebe oras ne’e iha, sira iha hotu ona konsellu redasaun,” dehan Expedito.

Membru governu ne’e hateten, kooperasaun ne’ebe SECOMS halo ho media sira tantu imprimi no online, governu sei la halo mos intervensaun ba independensia media hodi publika notisias.

Nune’e mos nia husu atu media sira bele tau jornalista senior iha kobertura nivel altu hanesan iha pozisaun prezidenti republika, primeiru-ministru, parlamentu nasional no tribunal rekursu.

“Ohin mos hau ko’alia ho editor informasaun xefi redasaun no ba editor sira media hotu-hotu kona-ba jornalista ida tenke iha kapasidade atu bele halo analiza, labele jornalista ida halo gravasaun fila mai transkripsi depois fo sai deit, jornalista tenke iha kapasidade ida atu analisis, bainhira halao intervista ho entidade ida, tamba ne’e maka ohin ami hasoru malu iha ne’e sira mos fo hanoin i hau mos fo hanoin ba sira kona-ba oinsa atensaun IX Governu Konstitusionál ba iha dezenvolvimentu media nomos no oinsa atu bele nafatin fo formasaun ba jornalista sira servisu hamutuk ho Conselho de Imprensa,” hateten Expedito.

Iha inkontru ne’e, koalia mos kona ba eventu nasional sira ne’ebe sei akontese iha tinan ne’e no SECOMS husu ba media sira hodi bele tau importansia mos ba atividade nasional ne’ebe governu halo halo loron nasional sira no importante ida ne’ebe sei akontese iha tinan 2025 maka Jogos Desportivas CPLP ne’ebe Timor-Leste iha tinan ne’e maka sai uma nain.