Espande Area Operasaun, AirAsia Sei Semo hosi Denpasar-Dili

DILI, www.news-viptv.com – Timor-Leste ba oin iha tan opsaun ba transporte aerea nian alende Aero Dili ho Citylink, AirAsia hahu setembru mos planu ona atu hahu voo dahuluk iha inisiu Setembru 2024 husi Denpasar mai Dili.

Voo dahuluk Air Asia ne’e hato’o dereta husi reprezentante Air Asia Indonezia ne’ebe opera husi PT. Indonesia AirAsia wainhira hasoru malu ho Primeiru-Ministru (PM), Kay Rala Xanana Gusmão, Segunda (8/7/2024), iha Palacio do Governo, Dili.

“Ami mai hasoru malu ho Primeiru Ministru hodi aprezenta ami nia interese hakarak atu haluan ami nia area operasaun. Iha ami nia planu, hakarak semo husi Denpasar mai Dili iha inisiu fulan setembru,” dehan Edwin, reprezentante AirAsia ba jornalista sira.

Edwin esplika, AirAsia hakarak hahu voo dahuluk iha Setembru tamba relasaun ho vizita Amu Papa Francisco nian mai Dili.

Xefe Governu rekomenda bá PT Indonesia AirAsia atu koordena ho Ministériu Transporte no Komunikasaun (MTK) Timor-Leste atu bele trata asuntu ne’e, nune’e bele realiza planu espansaun operasaun mai Díli.

AirAsia, esplika Edwin, iha inkontru ho PM Xanana, sei lori pasanjeiru sira husi ASEAN mai Timor-Leste liga ho konesaun ba Darwin, Australia.

“Ami sei lori pasajeiru sira husi ASEAN, ne’ebé sei hala’o konvensaun iha ne’e tanba ne’e ami sei hahú uluk liu aviaun ida ba Timor-Leste, maibé ami mós hare poténsia seluk atu semo ba Kuala Lumpur no Darwin, ne’ebé hein katak sei sai grupu bo’ot ida husi aviaun AirAsia nian husi nasaun barak iha Xina, Japaun, Korea, Malazia, no Tailandia atu marka prezensa iha ne’e,” nia dehan.

AirAsia durante ne’e konesidu ho voo baratu iha ne’ebe deit.

AirAsia dadauk ne’e iha aviaun hamutuk aviaun 100 no order tan hela aviaun 236 ho modelu Airbus A320-200 kapasidade pasajeiru 180 iha aviaun hamutuk 68, Airbus A320 Neo pasajeiru 186 ho aviaun total 29, Airbus A321 Neo ho pasajeiru 236 iha aviaun 2 no order tan 362, Airbus A330-300 ho pasajeiru 277 iha aviaun 1.