Eleita ba Xefi Suku, Joaninha Soares Agradese ba Votos Konfiansa Komunidade Bairo Pite

Dili, www.news-viptv.com – Xefe Suku Bairo Pite eleita, Joaninha Alves Soares hato’o nia agradese ba votos konfiansa komunidade Bairo Pite ne’ebe hili ona nia hodi asumi kargu xefi suku Bairo Pite foun.

“Husi ekipa susesu kandidatura Joaninha Alves Soares nian  tomak, ami hato’o felisitasaun agradese ho laran wain bo’ot tebes ba eleitores tomak, nebe’e maka fo ona votus konfiansa husi aldeia 26, ba ita bo’ot sira nian votus konfiansa tomak determina ikus hatudu rezultadu ba kandidatura Joaninha Alves Soares  sai vensedor,” hateten Francisco da Costa iha konferensia imprensa, Kuarta (15/11/2023), iha Sede Aldeia Fuslam, Kakaulidun, Dili.

Maski mai nu’udar estrutura baze Partidu CNRT nian, Joaninha Alves Soares kandidata an nu’udar kandidatu independente no eleita nu’udar xefi suku hodi halakon xefi suku atual João Baptista da Costa Belo ne’ebe asumi kargu refere durante tinan 20.

Iha eleisaun suku, ba ronde dahuluk Joaninha Alves Soares compete ho kandidatu 4 seluk no konsege okupa fatin daruak ho votos 3003 (27%), no iha elisaun ronde daruak votus konfiansa 5.498 (52%) ho nune’e Joaninha Alves Soares sei asumi kargu refere hosi 2023 to’o 2030.

Ekipa susesu mos husu nafatin ba komunidade Suku Bairo Pite atu kontinua tulun no apoia servisu xefi suku foun hodi dezemvolve Suku Bairo Pite diak liu tan iha futuru.

“Ho ida nee ami husu ba entidades sira hotu nia apoiu moral no idea hodi ita tulun malu, servisu hamutuk ho ita nia Xefe Suku eleitu, Joaninha Alves Soares hodi dezemvolve Suku Bairo-Pite nebe diak ba ita hotu,” dehan Francisco.

Iha Suku Bairo Pite hamutuk iha aldeia 26 ho nia total eleitores hamutuk 20.946. Maibe iha eleisaun ronde daruak eleitor 10.624 maka ezerse sira nia deretu votos.