Dezemvolve Desportu, CDTL Sei Servisu Hamutuk ho KONI

DILI, www.news-viptv.com – Hodi dezemvolve desportu ho diak liu tan no prestasaun ba atleta sira, Confederação Desportu Timor-Leste (CDTL) sei servisu hamutuk ho Komite Olimpik Nasional Indonesia (KONI).

Prezidenti CDTL, Macario Sanches hasai asuntu ne’e ba jornalista sira hafoin hasoru malu ho Ministru Juventude, Desportu, Arte no Kultura (MJDAK), Nelyo Isaac Sarmento iha edifisiu MJDAK, Lecidere, Dili.

“Informa mos Konfedarasaun Desporto Timor Leste sei ba asina akordu MoU ho KONI Indonesia nian ne’ebe sei akontese iha dia 30 Agostu 2023,” dehan Macario Saches, Segunda (21/8/2023).

Alende ne’e objetivu principal iha hasoru malu ho ministru maka ba aprezenta rezultadu kona ba asembleia ordinariu ne’ebe aprova ona alternasaun dahuluk ba estatutu CDTL, no planu annual no orsamentu ba tinan 2024, inklui simpozium nasional ba daruak ne’ebe CDTL sei organiza iha 9 Setembru 2023.

CDTL iha hasoru malu ne’e, informa mos estabelesementu CDTL Munisipiu Ainaro, Covalima no Bobonaro ho RAEOA hodi ajuda CDTL nasional implementa programa iha kada munisipiu.

“CDTL ho Governu (MJDAK) sei investe mos ba modalidade potensia ne’ebe representa Timor Leste atu hetan medalla osan mean iha jogus aziatiku (SEA Games) no jogus iha Asian (Asian Games),” dehan Prezidenti CDTL ne’e.