Dezastre 10-17 Junu, Uma 50 Estragus, Ema 2 Mate, 1 Atakasaun Lafaek

DILI, www.news-viptv.com – Autoridade Protesaun Sivil (APC) iha nia atualizasaun desastre ne’ebe akontese iha período 10 to’o 17 Junu 2024, estragus uma komunidade 50, inklui ema rua (2) mate.

Porta-Voz APC, João Filipe iha konferensia imprensa informa, mate ida ne’ebe hetan ataka husi Lafaek ho naran Alazinho do Nacio dos Santos, tinan 26 husi Aldeia Irara, Suku Parlamentu, Postu Administrativu Lautem, Munisipiu Lautem.

“Vitima ne’ebe lakon vida ne’e, ida maka Lafaek tata akontese iha 14 Junu, ho naran Alazinho do Nacio dos Santos, idade 26 no mate ida seluk eletrisidade maka soke iha Munisipiu Liquisa, Suku Asumanu Aldeia Kaikasiku, akontese iha 16 Junu ho naran Eugenio dos Santos ho idade 38,” dehan João Filipe, Tersa (18/6/2024), iha edifisiu APC Kaikoli, Dili.

Nia esplika, uma 50 ne’ebe hetan estragus ne’e akontese iha munisipiu 11 afeta ba uma kain nain 55 ne’ebe vitima sira mos hetan ona apoia emerjensia husi Komando APC munisipiu sira.

Uma 50 ne’ebe afetadu maka Munisipiu Ainaro, uma 2 hetan estragus tambá rai halai. Baucau anin sobu uma 5 no ahi-han uma 1, Bobonaro rai halai estragus uma 3, Covalima be sae estragus uma 33 no rai halai estragus uma 2, Dili ahi-han uma 1,  Ermera anin sobu uma 1 no rai halai estragus uma 1, Manufahi anin sobu uma 1, Lautem ema ida mate tambá atakasaun husi lafaek, Liquisa ema 1 mate, RAEOA ahi- han uma 1 no anin sobu uma 1, Viqueque ahi-han uma 1.

Ho desastre ne’ebe akontese, APC alerta nafatin ba komunidade sira atu hado’ok an husi fatin ne’ebe risku liliu iha railolon, mota ninin, no mos fatin ne’ebe iha rai maran no liliu ba dut ne’ebe bo’ot.