Banku Malazia Sei Loke Sukural iha Oekusi

DILI, www.news-viptv.com – Hodi dezenvolve ekonomia iha Rejiaun Administrativa Espesial Oekusi Ambeno (RAEOA), Banku ida hosi Malazia pronto ona atu loke nia sukursal iha Oekusi.

Prezidenti RAEOA, Rogerio Tiago Lobato esplika, Banku Malazia refere dadauk ne’e halo ona kontaktu ho Banco Central de Timor-Leste (BCTL) hodi hetan lisensa nu’udar banku legal ida iha Timor-Leste, espesial iha Oekusi.

“Banku Malazia sei loke cabang iha ne’eba, halo kontaktu ona ho BCTL para hetan lisensa loke Banku Malazia nian iha Oekusi,” dehan Rogerio Lobato ba jornalista sira hafoin entrega relatoriu irregularidade sira ne’ebe akontese iha RAEOA hosi prezidenti sessante sira, Sexta (19/7/2024), iha Palacio do Governo.

Alende banku hosi Malazia ne’ebe pronto ona loke nia sukural iha Oekusi, Bank Republik Indonesia (BRI) mos sei loke nia sukural iha Oekusi.

“BRI loke ona nia cabang iha ne’eba, asina ona akordu arrendamentu ho terras propriedade ba rai ida ho tinan 30 hodi harii sede,” informa Prezidenti RAEOA ne’e.

Ho BRI nia sukursal iha Oekusi, konta ho BNCTL no BNU, Oekusi dadauk ne’e iha ona banku tolu (3).

Eis Ministru Interior iha tempu Governasaun FRETILIN periodu 2002-2007 ne’e mos esplika, ho nia prezensa iha Oekusi nu’udar Prezidenti RAEOA, nia mos promote molok tinan 2 kompleta iha nia mandate, nia mos sei halo Estrada mos iha leten.

“Espera katak molok tinan 2 ka tinan 3 kompleta, estrada ihaOekusi halo hotu iha foho leten, estrada labele halo deit iha Pante Makassar, tenki halo iha Oesilio, Pasabe, hosi Pasabe ba Nitibe, Nitibe tuun ba Bauknana, hosi Nitibe ba Pante Makassar, ami espera katak iha tempu badak Estrada sira ne’e sei halo,” nia dehan hodi kontinua hateten, “Permeiru maka ne’e ami  aproveita fulan 3 rai maran para atu ateru Estrada sira foho leten, para populasaun iha foho leten bele lao ba, lao mai avontade, tamba Estrada ne’e aat, aat tebes, tamba udan tinan barak ona la halo revelitasaun Estrada”.