Assanami Akompana Ramos Horta no Xanana ba Oekusi

DILI, www.news-viptv.com – Prezidenti Partido Democratico (PD) Mariano Assanami Sabino hamutuk ho nia estrutura partidu balun akompana Kandidatu Prezidenti Republika Jose Ramos Horta ho Xanana Gusmao hodi viagem ba Oekusi.

Viagem ba Oekusi ne’e hodi apoia Ramos Horta nia kampana volta daruak nian, ne’ebe premiadu Nobel da Paz ne’e hili Oekusi hodi hahu nia kampana dahuluk.

Mariano Assanami Sabino ne’ebe iha volta dahuluk lakon compete hafoin hetan deit votos 47.334 (7,3%), iha volta daruak hamutuk ho Partido Democratico desidi ona atu fo votos konfiansa ba Ramos Horta.

Iha eleisaun volta dahuluk Iha apuramentu ne’e, hosi total 664.106 eleitores ne’ebe partisipa, numeru votos validu maka 651.859. Hosi numeru ne’e kandidatu ne’ebe hetan votos barak liu maka Jose Ramos Horta ho votos 303.477 (46.6%) no Francisco Guterres Lu-Olo ho votos 144.282 (22.1%) no kandidata Maria Angela Freitas da Silva maka hetan votos kiik liu ho votos 711 (0.1%).