Apoia ISS 30, MSSI Aloka Osan Miliaun US$ 1.3

Díli, www.news-viptv.com – Ministra Solidariedade Sosiál no Inkluzaun, Veronica das Dores asina akordu ho parseria Instituisaun Solidariedade Sosial (ISS) hamutuk 30, Tersa (18/6/2024, iha edifisiu MSSI, Kaikoli, Dili.

Total orsamentu ne’ebe Ministeriu Soliedaridade Sosial no Inkluzaun hodi fo apoia ba parseiria sira ne’e hamutuk miliaun US$ 1.3 liu husi orsamentu ba programa Subvensaun Publika tinan fiscal 2024.

Hafoin asina tiha akordu, Ministra apela ba ISS sira atu utiliza orsamentu ida-ne’e tuir regras, hodi tau matan ba ema vulnerável sira liuliu feto no labarik sira, liuhusi hadi’ak mekanizmu atendimentu, tanba sira presiza tebes hetan tratamentu espesiál.

“Ohin ita asina akordu ho Instituisaun Solidariedade Sosiál tanba Instituisaun sira ne’e reprezenta Ministériu Sosiál nia liman ain, atu tau matan ba ita-nia vitima sira ne’ebé maka hanesan, feto faluk, oan ki’ak, sira ne’ebé maka difisiénsia, ferik ho katuas, no violénsia oin-oin ne’ebé maka mosu iha ita-nia nasaun, entaun instituisaun sira ne’e maka hodi tau matan ba sira,” dehan Ministra Verónica das Dores.

Entretantu, Diretór Jerál Protesaun Sosiál, Florêncio Pina Dias Gonzaga iha ninia intervensaun, husu ba parseiria sira atu implementa orsamentu tuir programa ne’ebé previstu ona.

Adelaide Meninta husi Sentru Komunitário Vila Nova Baucau hateten ho apoia MSSI nian ne’e bele ajuda ona sira nia programa ne’ebe durante ne’e tau matan mos ba ema kbiit laek sira.

Instituisaun Solidaridade Social ne’ebe asina akordu ho MSSI nian ne’e ho atividade diferente hanesan instituisaun uma mahon 8 , instituisaun orfanato 5 , instituisaun ho difisiente 8 no instituisaun sentro komunitaria 9.