APC iha Ambisaun Bele Servisu Hamutuk ho ASEAN

DILI,  www.news-viptv.com  – Autoridade Protesaun Sivil (APC) iha inkontru ho Delegasaun Misaun Esploratoriu ASEAN Socio-Cultural Community (ASCC) ou Komunidade Pilar Sosial Kultural iha ambisaun bele servisu hamutuk ho ASEAN wainhira Timor-Leste sai ona membru.

Prezidenti APC, Superintedente Polisia Ismael da Costa Babo esplika vizita misaun esploratoriu ASCC ba servisu protesaun sivil nian pozitivu no bele hare besik liu tan kona ba servisu instituisaun refere ne’ebe sai mos pilar importante ida ba sociu-kultura.

“Ohin Autoridade Protesaun Sivil hetan oportunidade vizita husi ekipa ASEAN ninian no halo assesmentu avaliasaun preparasaun ba ita nia adesaun ba komunidade ASEAN. Protesaun Sivil sai hanesan pilar importante ida ou sasukat ba asuntu ida ne’e, sira mai ho delegasaun bo’ot ida mai hamutuk ho secretariadu ASEAN hodi hare’e preparasaun atendementu ba ita nia povu voltasaun dezastre iha Timor Leste no preparasaun ba iha nasaun vizinu ou iha rejiaun ASEAN nian ba nivel internasional,’’ dehan Superintedente Polisia, Ismael da Costa Babo ba jornalista sira hafoin simu delegasaun ASCC, Sexta (8/7/2022).

APC, nia esplika, nu’udar instituisaun foun iha ona ekipamentu standar internasional hodi alerta desastre naturais wainhira akontese hanesan alert aba tsunami, rai nakadoko, rai halai no mota sa’e.

“APC nia servisu mos hanesan F-FDTL no PNTL ne’ebe operazionaliza 24 oras,” nia dehan.

Dadauk ne’e, APC mos halo ona koperasaun ho institusaun hosi membru nasaun ASEAN ne’ebe toma konta ba responde desastre nian hanesan BNPB hosi Indonesia, Singapura, Filipina no Malazia, inklui nasaun non ASEAN hanesan Australia, Portugal no membru nasaun CPLP.

Delegasaun misaun esploratoriu ASCC ne’ebe halo vizita ba APC ne’e lidera hosi Dr. Dy Khamboly nu’udar SOCA Leader ho nia membru sira hosi nasaun Indonesia, Filipina, Myanmar, Kambodia, Singapura, Laos no hosi Sekretariadu ASEAN.