AJAR no JSMP Lamenta ho Indultu ba Emilia Pires

DILI, www.news-viptv.com – Organizasaun Naun Govermentais (ONG) ne’ebe durante ne’e tau matan ba servisu sistema judisiariu iha Timor-Leste, Asia Justice and Right (AJAR) no Judicial System Monitoring Program (JSMP) lamenta ho dezisaun Prezidenti Republika (PR) Jose Ramos-Horta fo ba kondenada kazu korrupsaun Emilia Pires nu’udar eis Ministra Finansas no Madalena Hanjam nu’udar eis Vise Ministra Saude iha IV Governu Konstitusional.  

Diretor Asia Justice and Right (AJAR) Timor-Leste, Jose Luis Oliveira konsidera indultu ne’ebe xefi estadu fo ba Emilia Pires viola ona konstituisaun.

“Prezidenti Republika fo indultu ba nia (Emilia Pires), ne’e ami konsidera katak aktus inkonstitusional, Prezidenti Republika viola ona konstituisaun,” dehan Jose Luis Oliveira ba jornalista sira iha konferensia imprensa, Sexta (15/12/2023), iha Farol, Dili.

Nia esplika, indultu labele fo ba ba ema ida ne’ebe sedauk halao kastigu ka pena, satan ba fujitivu hanesan Emilia Pires.

“Indultu ne’e perdaun ba pena, ba sentesa, ba kastigu, kuandu wainhira ema ruma hetan ona kastigu hosi tribunal, foin iha deretu atu hetan idultu, deretu ema rekruzu sira, narapidana ne’ebe hetan ona sentesa hosi Tribunal. Emilia Pires sedauk hetan sentesa hosi tribunal, nia halai hosi prosesu julgamentu, nia fujitivu, fujitivu ne’e todan, ne’e komete krime obidensia, ba Emilia Pires laos korrupsaun deit, ne’e krime halai, krimi publiku,” hateten Jose Luis Oliveira.

Entertantu JSMP liu hosi nia postingan iha pajina official JSMP Timor-Leste nian iha Facebook hakerek,” Lamenta ho desizaun Prezidenti Republika hodi fo indultu ba kondenada Emilia Pires no Madalena Hanjam iha okaziaun Loron Natal.”

Prezidente Republika liuhosi Dekretu Prezidente Repúblika iha Loron 14 Dezembru ho Nú.125/2023 hodi fó Indultu ba Prezu krime partisipasaun ekonómika no negosiu (Korrupsaun) ho numeru prosesu: NUC.1212/12.PDDIL ba kondenada Emilia Pires no Madalena Hanjam iha okaziaun Loron Natal ni’an.

Kondenada Emilia Pires nu’udar eis-Ministra Finansa iha desizaun Tribunál mantein pena prizaun tinan 7 no kondenada Madalena Hanjam, nu’udar eis-Vise Ministra Saúde ho pena prizaun tinan 4.

“JSMP sei fó nia opiniaun legál iha tempu besik kona-ba asuntu refere,” hakerek postingan JSMP nian ne’e.

Iha fatin ketak, Provedoria Direitus Humanus no Justisa (PDHJ) liu hosi konferensia imprensa deklara  PDHJ sei halo fiskalizasaun abstrata bá Lei Komutasaun Pena ne’ebé fó dalan bá xefi estadu hodi fó indultu.

“Lei Komutasaun Pena ne’e mak fó dalan bá Prezidente Repúblika atu fó indultu bá ema ne’ebé suspensaun, mesmu ema ne’e seidauk bá kadeia mós Lei ne’e fó dalan. Entaun presiza hare Lei ne’e. Buat ne’ebé PDHJ bele halo maka uza kompeténsia tuir artigu 151 atu halo fiskalizasaun abstrata bá inkonstituinalidade iha Lei ne’ebé promulga ona,” hateten Vírgilio Guterres, Sexta (15/12/2023) iha edfísiu PDHJ, Caicoli, Dili.