ACBIT Husu Governu Tau Matan ba Sobreviventa Persigisaun Tempu Indonesia

DILI, www.news-viptv.com – Assosiasaun Chega Ba Ita (ACBIT) hare katak feto sobrevivente barak ne’ebe sai vitima ba persigisaun tempu invasaun Indonesia sedauk hetan atensaun hosi governu, tamba ne’e ACBIT husu ba governu bele tau matan mos ba sobrevivente feto sira.

Koordenador Programa Hakbiit ACBIT, Celestina de Almeida esplika, ukun rasik an ne’ebe Timor-Leste hetan tamba mos kontribuisaun feto durante luta ba ukun rasik an, inklui feto sira ne’ebe sai sobrebevivente ba persigisaun hosi militar Indonesia sira, no sobreviventa lakon rai ne’ebe forsadamenta ou muda obrigatoriu too agora sedauk bele sai nain ba rain.

“Estadu favor ida tenki fo atensaun feto sobrevivente sira husi konflitu pasadu sira mos fo valor ba ukun aan ida ne’e tamba luta ne’e laos ema ida nian luta mos husi feto sobrevivente sira ne’ebe mak antes ne’e destera no hetan presegisaun maibe to’o ohin Governu seidauk tau atensaun maximu ba ida ne’e,” dehan Celestina ba jornalista sira, iha Fundasaun Haburas, Sexta (27/1/2024) iha Farol, Dili.

Nia esklarese, sei estadu rekonese veteranu/a sira, tamba sa feto sobrevivente sira mos labele hetan atensaun hanesan, tamba sira mos kontribui iha prosesu luta nian.

“Estadu Timor-Leste iha obrigasaun moral no tenki fo rekoñese sira. To’o ohin loron de’it mos la rekoñese maske programa mak bar-barak maibe la iha, ita nia advokasia mak liuhusi ONG ita bele ko’alia maibe proposta ba mos sira la passa liliu atu apoiu uma no aihan sira no bolsu estudu ba oan sira tamba ne’e ita bele dehan katak vítima sira ne’ebe husi konflitu passadu to’o 1999 sira seidauk hetan direitu ba ida ne’e tamba ne’e sira bele konsente katak sai bainaka ba rai rasik,” dehan Celestina.