Kampana Vasinasaun Kontra COVID-19 Kontinua Lao

DILI, news-viptv.com – Komisaun Inter-Ministerial ba Implementasaun Vasina COVID-19 (KIMIV-C19)  informa kampana vasinasaun iha Timor-Leste kontinua lao, inklui iha Kapital Dili kontinua lao maski iha Konfinamentu Domisiliariu Jeral.

Porta-voz KIMIV Covid, Dra. Danina Coelho esplika katak medidas restrisaun ne’ebe aplika iha fase ida ne’e,hanesan konfinamentu obrigatoriu,sei la aplika ba atividade kampaha vasinasaun kontra covid-19.

“Kampana vasinasaun ne’e kontinua iha rai laran tomak, iha fasilidade saude no mos sentru sira ne’ebe mak deifini ona,” dehan Dra Danina Coelho iha konferensia imprensa, Sexta (27/8/2021), iha Salaun Konferensia MSSI, Kaikoli, Dili.

Nia hatutan, “Numeru infesaun no mos mate aumenta iha semana kotuk ne’e,sentru izolamentu nakonu ho ema sira ne’ebe mak hetan moras covid-19,”tenik Dra.Danina Coelho.maioria husi ema sira ne’ebe mak iha forma grave ka mate ona,mak sira ne’ebe seidauk hetan vasina”.

Dra. Danina esklarese katak, Vasinasaun hanesan dalan diak liu atu proteje hasoru moras grave no mate. No apela ba populasaun sira ne’ebe elijivel ,idade tinan 18 ba leten atu simu lalais sira nia vasina no proteze sira aan husi forma grave husi moras ne’e no mos mate.

To’o ohin loron ema liu ona 50% mak simu ona sira nia doze dahuluk vasina ba COVID-19 nian no ema liu ona 25% iha Timor laran tomak mak simu ona vasina kompleta nain 192,000 ba doze daruak nian.

Dra. Coelho mos husu populasaun sira atu banati tuir protokolu saude sira hanesan fase liman bebeik uza sabaun no bee, mantein distansia (fiziku) iha fatin publiku, uza masker, mear ka fani karik tenki uja liman sikun,no labele kaer ita nia oin bainhira seidauk fase liman mos.

To’o ohin loron, Timor-Leste rejista ona kazu COVID-19 nian hamutuk 15,603 no entre ne’e nain 56 mak mate ona.