DILI, (VIP TV) – Primeiru-Ministru Timor-Leste, Kay Rala Xanana Gusmão, hato’o sentimentu tristeza no lamenta maka’as kona-ba kazu omisídiu ne’ebé rezulta iha lakon vida feto joven ida, Palomita Gusmão, iha área Tasi Tolu, Dili, iha loron 18 Novembru 2026. Tragedia ne’e sai hanesan alerta importante ba sosiedade, liuliu jerasaun foun, atu rejeita violénsia no hametin kultura dame.
PM Xanana hato’o sentimentu ne’e durante serimónia lansamentu fatuk dahuluk ba projetu reabilitasaun estrada urbana iha Munisípiu Likisá.
Iha oportunidade ne’e, Xefe Governu la subar nia sentimentu tristeza kona-ba akontesimentu ne’ebé lakon vida feto joven ida, depois de hetan alegadamente kanek tanba sona ho tudik dala barak husi mane joven ida.
“Ha’u rona kazu ne’e, ha’u sente triste tebes. Joven mane ida ne’ebé sona joven feto ida dala barak iha nia isin to’o nia lakon vida. Favor ida, joven sira buka servisu, buka atividade produtiva. Se la iha servisu, bele buka dalan seluk atu halo buat ne’ebé di’ak, la’ós halo buat hanesan ne’e,” dehan PM Xanana tuir publikasaun SMNews.
PM Xanana mós fó hanoin ba jerasaun foun atu la halo diferensa grupu, bandeira organizasaun ka influénsia arte marsiál sai razaun atu hamosu konflitu no hahalok violénsia.
Nia apela ba joven sira atu respeita malu, hametin relasaun fraternidade no la husik diferensa identidade grupu estraga relasaun sosial, família no komunidade.
Violénsia la rezolve problema, maibé bele lori konsekuénsia grave, hahú husi kanek físiku, trauma psikolojiku, lakon liberdade to’o lakon vida ema nian.
PM Xanana enkoraja joven Timor-Leste atu uza sira-nia tempu, enerjia no kapasidade ba atividade produtiva no konstrutiva.
Buka servisu, kontinua edukasaun, aprende koñesimentu no abilidade foun, no partisipa iha atividade sosial no komunidade mak dalan importante atu prepara futuru ne’ebé di’ak liu.
Jerasaun foun iha responsabilidade boot atu kontribui ba dezenvolvimentu nasaun. Tanba ne’e, solidariedade, respeitu malu, toleránsia no responsabilidade tenke sai valor importante iha moris loroloron.
Tragedia ne’ebé akontese iha Tasi Tolu mós sai hanesan alerta ba família, eskola, lideransa komunidade no instituisaun relevante sira atu aumenta atensaun ba edukasaun karakter, orientasaun no prevensaun violénsia entre joven sira.
Lakon vida ema ida la’ós de’it lori tristeza boot ba família ne’ebé sofre lakon, maibé mós sai lakon ida ba sosiedade tomak.
Diferensa opiniaun, grupu ka identidade labele sai razaun atu ema ida halo violénsia hasoru ema seluk.
Mensajen PM Xanana ne’e sai hanesan konvite ba sidadaun hotu, liuliu jerasaun foun, atu hametin unidade, respeitu malu no kompromisu ba dame.
Futuru Timor-Leste depende mós ba jerasaun foun ne’ebé hili dalan konstrutivu, proteje vida no harii sosiedade ne’ebé seguru no dame.
### MARI ALKATIRI VISITA FAMÍLIA PALOMITA, HATO’O KONDOLÉNSIA BA INAN-AMAN
Kazu omisídiu ne’ebé rezulta iha lakon vida Palomita Gusmão mós hetan atensaun husi Eis-Primeiru-Ministru Timor-Leste, Mari Alkatiri, ne’ebé agora hala’o knaar hanesan Sekretáriu-Jerál FRETILIN.
Mari Alkatiri halo vizita ba uma mate Palomita atu hasoru diretamente inan-aman no membru família sira, hodi hato’o sentimentu tristeza no kondolénsia ba família ne’ebé sofre lakon.
Iha vizita ne’e, nia hato’o solidariedade ba família, ne’ebé agora hasoru tempu susar tanba lakon oan feto iha maneira ne’ebé trágiku.
nunee mos EisPM Mari Alkatiri atual Sekretariu Jeral Partidu afretilin noPresidenti Interinu hato’o mos ni lamentasaun ba kazu palomita hakat ba mate umano hasoru familia Palomita, Kinta (19/11), iha Matadouru Dili.
Prezensa Mari Alkatiri iha uma mate ne’e hatudu atensaun no solidariedade ba família vítima, iha momentu ne’ebé família presiza apoiu no konsolasaun husi komunidade no lideransa sira.
Kazu ne’e hamosu tristeza no preokupasaun iha sosiedade Timor-Leste, no sai hanesan alerta kona-ba nesesidade atu hametin prevensaun violénsia, liuliu entre jerasaun foun.
Família Husu Justisa Ba Palomita
Iha momentu ne’e, família Palomita Gusmão mós hato’o apelu ba sosiedade tomak atu hamriik hamutuk no respeita prosesu justisa ba kazu omisídiu ne’e.
Família husu atu ema hotu fó atensaun ba kazu ne’e no kontinua akompaña prosesu investigasaun to’o autoridade kompetente sira konsege identifika no lori autór ba responsabilidade tuir lei, hodi hetan kastigu ne’ebé merese.
“Hanesan avo slakon bei oan idane’efaamilia hadomi. lakon ne’ebesenti la satisfas teb-tebes iha situasaun ida ne’e,” dehan avo mane Palomita iha konferensi imprensa, Kinta (19/11/2026), iha Matadouro,Dili.
” dehan Família hakarak atu justisa hala’o nia knaar ho transparénsia no responsabilidade, atu ema ne’ebé komete krime ne’e la livre husi responsabilidade legal.
“hanesan avo ami hakarak justisa,” nia deklara.
Apelu família nian mós sai hanesan mensajen ba sosiedade atu la husik kazu violénsia hasoru feto no joven sira hela de’it hanesan krime ne’ebé la hetan justisa.













