PR Horta Simu Vizita Investidor Indianu Sira

DILI, www.news-viptv.com –  Prezidente Repúblika, J. Ramos-Horta, simu delegasaun nivel altu husi líder emprezariál no investidór sira husi Índia iha Palásiu Prezidensiál Nicolau Lobato Tersaohin(2/9/2026.

Akompaña husi Embaixadór Timor-Leste nian ba Índia, Karlito Nunes, delegasaun ne’e halo vizita kortezia ba Xefe Estadu hodi aprezenta sira-nia misaun atu esplora oportunidade komérsiu bilaterál, investimentu, no parseria iha territóriu nasionál tomak.

Delegasaun ne’ebé halo vizita ne’e konsiste husi reprezentante empreza hamutuk maizumenus sanulu ne’ebé abranje setór oioin, inklui kuidadu saúde, agrikultura, edukasaun, infraestrutura, turizmu, minéru, no mina ho gás. Investidór sira halo hela reuniaun ho instituisaun nasionál xave sira, inklui TradeInvest Timor-Leste, Kámara Komérsiu no Indústria Timor-Leste (CCI-TL), Vise-Primeiru-Ministru, no ministru tutela sira hanesan Saúde no Agrikultura hodi avalia ekosistema investimentu doméstiku, inklui planu kooperasaun ho Star King Medical Centre (SKMC) hodi destaka médiku espesialista sira.

Prezidente Ramos-Horta simu ho laran-ksolok kompromisu no interese boot delegasaun nian atu investe iha Timor-Leste, hodi enkoraja ba trajetória estratéjika no poténsia ekonómika nasaun nian ne’ebé foin mosu iha rejiaun, liuliu bainhira nasaun ne’e avansa ba ninia integrasaun iha ASEAN.

Xefe Estadu destaka Timor-Leste nia abertura ba investimentu diretu estranjeiru ho kualidade aas ne’ebé apoia diversifikasaun nasionál, kapasitasaun, no dezenvolvimentu ekonómiku sustentável.