PR Kompromete Sei Tau Matan ba Oan Kiak Nain-5 iha Sanerin

Balibo, www.news-viptv.com –  Relasiona ho ho kondisaaun oan kiak nain 5 iha Aldeia Caco, Suku Sanerin, Postu Administrativu Balibó, Munisípiu Bobonaro, ne’ebe lakon sira nia inan-aman tutuir malu, Prezidenti Repulika, Jose Ramos-Horta sei tau matan ba oan kiak refere.

Resposta sei tau matan ne’e xefi estadu hateten, hafoin oan feto bo’ot, Rosalina da Purificação, iha nia “carta” ne’ebé nia le’e diriji ba Prezidente Ramos-Horta liu husi video ho durasaun minutu ida, husu apoiu umanitáriu no fó tulun ba asesu sira nia estudu iha futuru.

“Ami oan kiak nain-5 hato’o ami nia komprimenta Boatarde ba Avo nai Prezidente. Atu husu tulun ba Prezidente ho Avo nia laran luak ajuda ami nain-5. Ami nia inan Mate foin semana 3 liu ba no ami nia aman foin lalais mak mate. Ami husu atu Prezidente bele tau matan mai ami nia eskola, hahan no hatais,” dehan Rosalina iha video refere ne’ebe sira iha komunikadu imprensa ne’ebe redasaun simu.

Simu tiha informasaun ne’e, Prezidente orienta kedas nia ekipa Unidade Sosiedade Sivíl no Asuntu Sosiál Prezidénsia Repúblika, hodi halo vizita urjenti ida ba família refere. Assesor Prezidénsia Repúblika Quintiliano Moniz hateten katak, sira nia parte sei koopera ho autoridade munisipál no Ministériu Edukasaun atu garante ba oan sira nia asesu ba edukasaun no apoiu sosiál.

“Husi Prezidénsia kompromete atu kontinua tau matan liu-liu ba bebé ne’ebé sei iha fulan ha’at no sei fó asisténsia kondisaun saúde ba família ne’e,” hateten Quintiliano.

Tuir kronolojia ne’ebé hato’o husi família no komunidade viziñu katak, sira nia inan Matebian Aliança Maia, antes ne’e moras dadaun ona hafoin matebian fó partu ba nia oan feto ikun, liu husi prosesu operasaun iha Hospital. Kondisaun ne’e grave liu tan bainhira to’o fulan-4 deit, família refere simu realidade katak sira nia inan hakotu-i’is (mate) no husik hela oan nain-4 ho bebé ida ne’ebé sei ki’ik-oan foin halo ba fulan-4. Liu tiha semana rua, ninia la’en, Anselmo da Purificação, mos hakotu nia I’is (mate) tanba ho presaun emosional psikolojia.

Dadaun ne’e, oan kiak nain-5 hela hamutuk ho sira nia avó feto no inan-bin bo’ot ne’ebé agora assume responsabilidade atu tau matan hela ba sira. Xefe Suku Sanerin, Francisco R. Tavares, agradese ba Prezidente Ramos-Horta tanba bele responde lalais ba situasaun família refere, hodi haruka kedas ekipa husi Gabinete Prezidénsia atu ba fó apoiu direta.

Iha vizita refere, ekipa Prezidénsia Repúblika mos entrega apoiu nesesidade bázika hanesan fos, mina, roupa no osan balun ne’ebé mai husi Prezidente nia bolsu rasik, hodi ajuda hakmaan ba família refere iha tempu emerjénsia ne’e.