19 Marsu, Povu Timor-Leste sei Vota ba Prezidenti Republika

DILI, www.news-viptv.com – Povu Timor-Leste iha 19 Marsu 2022 sei fo nia votu ba nia Prezidenti Republika foun iha eleisaun prezidnesial.

Loron ba eleisaun prezidensial ne’e rasik dekreta ona hosi Prezidenti Republika, Francisco Guterres “lu-Olo” liu hosi Dekretu Prezidenti Republika numeru 2/2022 kona ba marka data ba eleisaun prezidensial no publika ona iha Jornal da Republica loron sabadu, 15 Janieru 2022.  

Ba kampana kandidatu sira nian sei halao durante semana rua entre 2 to’o 16 Marsu. Karika laiha kandidatu ida maka manan maioria, sei halao eleisaun segunda volta iha 19 Abril 2022.

Desde restaura nia independensia iha 20 Maiu 2002, Timor-Leste halao ona eleisaun prezidensial ba dala 4 ne’ebe realiza ona iha 2002, 2007, 2012 no 2017.

Hosi tinan ne’ebe realiza ona iha 2002-2007 asumi kargu Prezidenti Republika maka Kay Rala Xanana Gusmaõ, Jose Ramos Horta (2007-2012), Taur Matan Ruak (2012-2017) no Francisco Guterres Lu-Olo (2017-2022).

Ba eleisaun prezidensial tinan 2022 iha ona naran barak ne’ebe hakarak kandidatu nia kandidatura ba presidenti republika hanesan Jose Ramos Horta, Lere Anan Timur, Mariano Assanami Sabino, Armanda Berta, Milena Pires, no Virgilio Guterres ne’ebe dadauk ne’e mosu ona sira nia naran iha publiku.