12 Dezembru, PN Hahu Diskusaun Jeneralidade OJE 2024

DILI, www.news-viptv.com – Hafoin remata ona audensia ho instituisaun hosi orgaun soberania 4, Komisaun C Parlamentu Nasional ajenda ona 12 Dezembru 2024 ba loron diskusaun jeneralidade ba Orsamentu Jeral Estadu (OJE) 2024.

Prezidenti Komisaun C PN, Cedalizia Faria dos Santos, hafoin diskusaun jeneralidade OJE nian, sei kontinua ho diskusaun espesialidade kada ministeriu no instituisaun estadu sira.

“Espesialidade ne’e ita tau iha loron 5, maibe konforme fila fali proposta ne’e barak liu ga  proposta ne’e ituan. Liu ka la iha, proposta ita tau loron 5 ne’e bele hatun mai loron 4 maibe Hau hanoin proposta ne’e barak kadavez to’o loron 5 Lae 6 ne’e. Hau sente liu Ita bele prolonga horas deit doke Ita finaliza no Ita bele aumenta tan horas deit,” informa deputada hosi Bankada CNRT ne’e ba jornalista sira, Kuarta (6/12/2023) iha Uma Fukun PN, Dili.

Maioria Komisaun sira termina ona audiénsia publika ba Proposta OJE 2024 Parlamentu Nasionál liu husi Komisaun Espesializada Permanente sira, iha 5 Dezembru 2023, maioria finaliza ona sesaun audiénsia publika ba Proposta Orsamentu Jerál Estadu ba 2024 nian ho Governu liu husi ministériu relevante sira.

Iha audiénsia ba loron dahaat ne’e; Komisaun B ne’ebe trata asuntu Negosiu Estranjeiru, Kooperasaun, Defeza no Seguransa, halo audiénsia ho Sekretáriu Estadu Protesaun Sivil, Autoridade Protesaun Sivil no Komisaun Reguladora Arte Marsial sira.

Komisaun C ne’ebe trata asuntu Finansas Públikas, hamutuk ho Komisaun D ne’ebe trata asuntu Ekonomia no Dezenvolvimentu, Komisaun E ne’ebe trata Asuntu Infraestrutura no Komisaun F ne’ebe trata asuntu Saude, Seguransa Sosial no Igualdade Jeneru halo audiénsia ho Ministra Finansas, Autoridade Tributaria, Autoridade Aduaneira no Banku Sentral Timor-Leste.

Komisaun E ne’ebe trata asuntu Infraestrutura halo audiénsia ho Sekretariu Estadu Bee no Saneamentu, BTL-EP, EDTL-EP, IGEADE no ADN-I.P.

Komisaun G ne’ebe trata asuntu Edukasaun, Juventude, Kultura no Sidadania halo audiénsia ho Universidade Timor Lorosa’e. Entretantu Komisaun A ne’ebe trata asuntu Konstitusionais no Justisa halo apresiasaun ba relasoriu no pareser audiénsia ba OJE 2024 nian.

Ba audiénsia loron dalimak nian, Komisaun B sei halo audiénsia ho g7+, enkuantu komisaun sira seluk halo apresiasaun ba relatoriu no pareser komisaun nian hodi envia ba Komisaun C hodi elabora antes ba diskusaun jeneralidade iha 12 dezembru ne’e.

Iha 23 Novembru 2023, Parlamentu Nasionál liu husi Prezidente Parlamentu Nasionál, Maria Fernanda Lay, simu ona Proposta OJE 2024 ne’ebé entrega diretamente husi Ministra Finansas, Santina José Rodrigues F. Viegas Cardoso, akompaña husi Vise-Ministra Finansas, Felicia Claudinanda da Cruz Carvalho no Vise-Ministru Asuntu Parlamentar, Aderito Hugo da Costa, ne’e ho valór totál konsolidadu millaun rihun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál. Valór ida-ne’e inklui dotasaun millaun rihun US$ 1,83 ba Administrasaun Sentrál no millaun US$ 60 uza ba RAEOA.

Husi montante totál despeza ne’ebé prevee ba Administrasaun Sentrál no RAEOA, millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.

Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6.

Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas.

Hafoin entrega, Prezidente Parlamentu Nasionál informa katak iha tempu badak sei konvoka reuniaun ho Prezidente Komisaun Espesializada Permanente sira hodi diskute ajendamentu ba diskusaun OJE 2024 refere.