Xefi Estadu Promulga OJE 2024

DILI, www.news-viptv.com – Prezidente Repúblika (PR), José Ramos-Horta, Sexta (22/12/2023) promulga ona Orsamentu Jerál Estadu (OJE) ba tinan 2024 ne’ebé Xefe Estadu simu proposta ne’e iha 21 Dezembru 2023 tuir dekretu Parlamentu Nasionál númeru 5/VI-OJE ba 2024.

“Hafoin promulgasaun, Prezidente Repúblika entrega kedas ba Prezidente Parlamentu Nasionál, Fernanda Lay,” hakerek komunikadu imprensa ne’ebe redasaun asesu.

Proposta OJE 2024 aprezeta husi Governu da-IX ne’ebé lidera hosi Primeiru-Ministru Kay Rala Xanana Gusmão ba Parlamentu Nasionaál iha 12 Dezembru 2023 no hetan aprovosaun iha final global iha loron 20 fulan ne’e ho totál orsamentu billiaun US$ 1.95.

Proposta OJE ne’ebe aprovadu ho totál konsolidadu millaun rihun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.

Valór ida-ne’e inklui dotasaun millaun rihun US$ 1,83 ba Administrasaun Sentrál no millaun US$ 60 uza ba RAEOA.

Husi montante totál despeza ne’ebé prevee ba Administrasaun Sentrál no RAEOA, millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.

Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6. Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas.